ოკუპირებულ აფხაზეთს საწვავი კომპანია „სოლიდუსმა“ მიაწოდა. ამის შესახებ „რადიო თავისუფლება“ წერს, რომელსაც მთავრობის ადმინისტრაციაში უთხრეს, რომ საწვავის მიწოდება „სპეციალური საწარმოს სტატუსის“ მქონე კომპანიამ განახორციელა და ამისთვის ახალი სამართლებრივი აქტის გამოცემა არ გამხდარა საჭირო.
„პირისთვის სპეციალური საწარმოს სტატუსის მინიჭების“ წესი 2019 წელს პრემიერმა მამუკა ბახტაძემ დაამტკიცა, რომლითაც გათვალისწინებულია „სპეციალური საწარმოს სტატუსის“ მქონე კომპანიის მიერ ოკუპირებულ ტერიტორიაზე საქონლის მიწოდებაც.
„სპეციალური საწარმოს სტატუსი“ წლებია, მინიჭებული აქვს შპს „სოლიდუსს“, რომელიც ირკვევა, რომ მანამდე აფხზეთს სასოფლო-სამეურნეო პროდუქციას აწვდიდა. ამის შესახებ „რადიო თავისუფლებას“ თავად კომპანიის მფლობელმა გიორგი არველაძემ უთხრა.
11 აგვისტოს კი, მთავრობის განკარგულებით, მას სამი თვით გაუგრძელეს ოკუპირებულ ტერიტორიაზე საქმიანობისთვის სპეციალური თანხმობის მოქმედება.
არველაძის თქმით, საუბარია დაახლოებით 300 ტონა საწვავზე (და არა 3 ათასზე), რომელიც მისმა კომპანიამ, ენგურის ხიდის გავლით, აფხაზ პარტნიორებს მიაწოდა. ის ასევე ამბობს, რომ „აქამდე ხდებოდა სასოფლო-სამეურნეო და საკვები პროდუქციის მიწოდება, საწვავის მიწოდება პირველად მოხდა“. არველაძის ინფორმაციით, საწვავი, რომელსაც მისი კომპანია ქართულ ბაზარზე ყიდულობს „ძირითადად გალის მოსახლეობისთვის, იქაური ბენზინგასამართი სადგურებისთვის“ არის განკუთვნილი. „ეს რომ არ შეგვეტანა, 20-ლიტრიანი კანისტრებით დაიწყებდა 40 ათასი ქართველი გადმოსვლას ზუგდიდში. ამიტომაც გადაწყდა, რომ ჯობდა მე შემეტანა ჩემს აფხაზ მეგობრებთან ერთად“ – ამბობს არველაძე „რადიო თავისუფლებასთან“.
ეკონომისტი რომან გოცირიძე (ისევე როგორც „ოცნების“ სხვა ოპონენტები), რომელიც ოკუპირებულ რეგიონში საწვავის მიმწოდებელი კომპანიის დასახელებას ითხოვდა, ამბობს, რომ ამით კითხვები არ მოხსნილა. ის არ გამორიცხავს, რომ რეალური მიმწოდებელი მსხვილი ქართული ნავთობიმპორტიორი კომპანია იყოს, რომელმაც სანქციების შიშით ამ „შემოვლითი გზით გაუმართა ხელი სეპარატისტულ რეჟიმს“.
„როგორც ირკვევა, აფხაზეთში საწვავის შეტანის მაქინაციაში ხელისუფლებამ სპეციალური რეჟიმის მქონე შპს გამოიყენა, რომელსაც აფხაზეთთან სავაჭრო ურთიერთობების ნებართვა ჰქონდა. იბადება კითხვა-ამ ჯიხურის სიდიდის სამეწარმეო სუბიექტმა სად იშოვა ამდენი საწვავი? ხომ არ ნიშნავს ეს, რომ სინამდვილეში რეალური მიმწოდებელი არის მსხვილი ქართული ნავთობიმპორტიორი კომპანია, რომელმაც სანქციების შიშით ამ შემოვლითი გზით გაუმართა ხელი უკრაინასთან ომში რუსეთის მოკავშირე აფხაზეთის სეპარატისტულ წარმონაქმნს? აშკარაა, რომ „ოცნების” ხელისუფლებამ რუსეთის დავალებით იმოქმედა“, – აცხადებს რომან გოცირიძე.
