„იაპონიის პრემიერის ყბედობა არაფერს შეცვლის, კურილის კუნძულები იყო, არის და იქნება რუსეთის ტერიტორია“ – ეს განცხადება რუსეთის უშიშროების საბჭოს თავმჯდომარის მოადგილემ, დიმიტრი მედვედევმა გააკეთა.
„იაპონიის პრემიერ ტაკაიჩის შეუძლია რამდენიც სურს იმდენი ისაუბროს იმაზე, რომ კურილის კუნძულები „ისტორიულად იაპონურია“, თუმცა, ეს ყბედობა არაფერს შეცვლის“, – განაცხადა მედვედევმა.
მედვედევმა ეს განცხადება იაპონიის პრემიერ-მინისტრის სანაე ტაკაიჩის საპასუხოდ გააკეთა, რომელის თავის მხრივ, დღეს, სადავო კურილის კუნძულების ყველაზე დიდ კუნძულ იტურუპზე ვლადიმერ პუტინის ვიზიტს გამოეხმაურა და მას „აბსოლუტურად მიუღებელი“ უწოდა. ტაკაიჩიმ პრესკონფერენციაზე განაცხადა, რომ პუტინის ეს ნაბიჯი „უხეშად ლახავს იაპონელი ხალხის გრძნობებს“ და ეწინააღმდეგება ტოკიოს მყარ პოზიციას. პარალელურად, იაპონიის საგარეო საქმეთა მინისტრმა ტოშიმიცუ მოტეგიმ პროტესტის ნიშნად სასწრაფოდ გამოიძახა რუსეთის ელჩი.
რუსეთის სახელმწიფო მედიის ცნობით, ეს არის ვლადიმერ პუტინის პირველი ოფიციალური სტუმრობა ამ სადავო არქიპელაგზე. ის კუნძულზე შეხვდა რეგიონის გუბერნატორს, დაათვალიერა თევზგადამამუშავებელი ქარხანა, ადგილობრივი საავადმყოფო და სკოლა.
„ჩრდილოეთის ტერიტორიები, როგორც ისტორიულად, ისე საერთაშორისო სამართლის მიხედვით, იაპონიის განუყოფელი ნაწილია. ეს ვიზიტი იაპონელი ხალხის გრძნობებს ტკივილს აყენებს და სრულიად მიუღებელია. რუსეთის მიერ უკრაინაში აგრესიის გამო, იაპონია-რუსეთის ურთიერთობების მძიმე მდგომარეობის მიუხედავად, იაპონია ძალისხმევას არ იშურებდა, თუმცა უნდა ითქვას, რომ ამ ვიზიტმა იაპონიაში რუსეთის მიმართ განწყობა კიდევ უფრო გაამწვავა და საშუალო თუ გრძელვადიან პერსპექტივაში ურთიერთობების აღდგენა გაართულა. ვიმედოვნებთ, რომ რუსეთი ამ საკითხის მნიშვნელობას სერიოზულად მოეკიდება“, – განაცხადა იაპონიის პრემიერ-მინისტრმა.
რუსეთისთვის კუნძულ იტურუპს უდიდესი სამხედრო დანიშნულება აქვს — იქ განთავსებულია რუსეთის წყნარი ოკეანის ფლოტის მთავარი სამხედრო-საჰაერო ბაზა რეგიონში და კუნძულები მოსკოვს ოკეანეზე თავისუფალ გასასვლელს უნარჩუნებს