პენ საქართველო განცხადებას ავრცელებს, რომელშიც ამბობს, რომ სასჯელაღსრულების დაწესებულებებში პატიმრებისთვის გაგზავნილი წიგნები პოლიტიკურ ცენზურას ექვემდებარება
“რუსთავის #5 ქალთა დაწესებულების ადმინისტრაციამ უარი განაცხადა 2025 წლის ოქტომბრიდან პატიმრობაში მყოფი სამოქალაქო აქტივისტის, ნანა სანდერისთვის ლაშა ბუღაძის რომანის, „დამკვირვებელი“, გადაცემაზე. „რადიო თავისუფლების“ თანახმად, ლაშა ბუღაძე პირველი ქართველი ავტორია, რომლის მხატვრული ტექსტიც სასჯელაღსრულების დაწესებულებაში არ დაუშვეს.
პენ-საქართველოს შეფასებით, ეს ლიტერატურული ნაწარმოების ცენზურის საგანგაშო შემთხვევაა, რომელიც უკავშირიდება არა მხოლოდ რომანის შინაარსს, არამედ – სრულიად აშკარად – ავტორის პოლიტიკურ და სამოქალაქო პოზიციას.
მხატვრული ლიტერატურის ცენზურა, როგორც გამოხატვის შეზღუდვის მცდელობა, დაუშვებელია დემოკრატიულ საზოგადოებაში.“–ნათქვამია განცხადებაში.
რადიო თავისუფლებამ გაავრცელა ინფორმაცია, რომ მწერალ ლაშა ბუღაძის ბოლო რომანი „დამკვირვებელი“, რომელსაც „4 ოქტომბრის საქმეზე“ მსჯავრდადებულ ნანა სანდერს უგზავნიდნენ, რუსთავის ციხეში არ დაიტოვეს – იმ არგუმენტით, რომ „წიგნი პოლიტიკურია… პატიმრისთვის არ შეიძლება“.თუმცა პენიტენციურ კოდექსში არ არსებობს ჩანაწერი, რომელიც ციხეში მხატვრული ლიტერატურის შეტანას კრძალავს. რადიო თავისუფლების ინფორმაციით, გარდა ამისა, ყოფილა არაერთი ისეთი შემთხვევა, როდესაც ციხის თანამშრომლები, ზემდგომებთან კონსულტაციის შემდგომ, სხვადასხვა სახის ლიტერატურის პატიმრებისთვის გადაცემაზე უარს ამბობენ.რადიო თავისუფლებამ იუსტიციის სამინისტროშიც და მის დაქვემდებარებულ უწყებაში, სპეციალურ პენიტენციურ სამსახურშიც იკითხა, რატომ არ მივიდა რომანი “დამკვირვებელი” ადრესატამდე, რა ნიშნით ჩაითვალა ეს მხატვრული ტექსტი პოლიტიკურად და ვინ მიიღო მის შეგზავნაზე უარის გადაწყვეტილება, თუმცა კითხვები უპასუხოდ დარჩა.