იტალიის პოლიციამ ერთ-ერთი ეჭვმიტანილის სახლში რენუარის, სეზანისა და მატისის სამი ნახატი აღმოაჩინა, რომლებიც მარტში პარმასთან მდებარე კერძო მუზეუმიდან მოიპარეს. მათი საერთო ღირებულება რამდენიმე მილიონ ევროდ არის შეფასებული.
იტალიის პოლიციამ ფრანგი მხატვრების — პიერ-ოგიუსტ რენუარის, პოლ სეზანისა და ანრი მატისის — ნახატები აღმოაჩინა, რომლებიც მარტში ქვეყნის ჩრდილოეთ ნაწილში მდებარე მუზეუმიდან მოიპარეს. მოპარული ნამუშევრები ერთ-ერთი ეჭვმიტანილის სახლში იპოვეს, — განაცხადა 14 აგვისტოს პარმის პოლიციის უფროსმა ანდრეა პალიარომ.
მისი თქმით, საქმეზე ეჭვმიტანილად მოლდოვის ცხრა მოქალაქე ფიგურირებს, რომელთაგან ხუთი, სავარაუდოდ, უშუალოდ მონაწილეობდა ქურდობაში.
საუბარია რენუარის გვიანდელ ნამუშევარზე „თევზები“, სეზანის ფანქრითა და აკვარელით შესრულებულ „ნატურმორტზე ალუბლებით“ და მატისის აკვარელზე „ოდალისკა ტერასაზე“. მათი სავარაუდო საბაზრო ღირებულება, შესაბამისად, დაახლოებით 3 მილიონი, 6 მილიონი და 20 ათასი ევროა.
ნახატები იტალიის ერთ-ერთი უმნიშვნელოვანესი კერძო კოლექციიდან მოიპარეს
ნამუშევრები მარტის ბოლოს პარმასთან მდებარე ლუიჯი მანიანის სახელობის ფონდის კერძო კოლექციიდან მოიპარეს. კოლექციაში დაცულია ევროპელი მხატვრების შედევრები, მათ შორის ტიციანის, ალბრეხტ დიურერის, პიტერ პაულ რუბენსისა და ფრანსისკო გოიას ნამუშევრები. მანიანი-როკას ფონდის მუზეუმი იტალიის ერთ-ერთ უმნიშვნელოვანეს სამხატვრო კოლექციად ითვლება.
მანამდე გავრცელებული ინფორმაციით, ქურდებმა, რომლებსაც სახეები კაპიუშონებით ჰქონდათ დაფარული, მუზეუმის შესასვლელი კარი გატეხეს და უკვე სამი წუთის შემდეგ ნახატებთან ერთად მიიმალნენ. მოგვიანებით ფონდში განაცხადეს, რომ საქმე წინასწარ დაგეგმილ დანაშაულს ეხებოდა, რომელიც „უფრო შორს ვერ წავიდა ვიდეომეთვალყურეობის სისტემისა და პოლიციისა და დაცვის სწრაფი რეაგირების წყალობით“.