აშშ-ის ფედერალურმა სასამართლომ უკანონოდ ცნო დონალდ ტრამპის ადმინისტრაციის გადაწყვეტილება, რომლის მიხედვითაც 75 ქვეყნის, მათ შორის საქართველოს მოქალაქეებისთვის საიმიგრაციო ვიზების გაცემა შეჩერდა. ფედერალური სასამართლოს მოსამართლე ჟანეტ ვარგასმა დაადგინა, რომ ეს პოლიტიკა კანონს ეწინააღმდეგება და სახელმწიფო მდივანმა მარკო რუბიომ უფლებამოსილებას გადააჭარბა, როდესაც ვიზების გაცემის აკრძალვა მხოლოდ განმცხადებლების მოქალაქეობას დაუკავშირა.
მოსამართლის განცხადებით, კანონმდებლობა სახელმწიფო მდივანს საკონსულო თანამშრომლების საქმიანობაში ასეთი ჩარევის უფლებას არ აძლევს. ცალკეული ქვეყნების მოქალაქეებისთვის ვიზების გაცემის სრული აკრძალვა პირდაპირ ეწინააღმდეგება განაცხადების განხილვის კანონით დადგენილ პროცედურას.
სახელმწიფო დეპარტამენტმა შეზღუდვები იანვარში შემოიღო. აშშ-ის ხელისუფლება აცხადებდა, რომ ჩამონათვალში შესული ქვეყნებიდან ჩამოსული პირები მაღალი ალბათობით შესაძლოა სახელმწიფოსთვის ფინანსურ ტვირთად ქცეულიყვნენ და აშშ-ში სოციალური დახმარებით ესარგებლათ. თუმცა მოსამართლის გადაწყვეტილებაში ეს დასაბუთება უარყოფილია.
მოსამართლე ვარგასის გადაწყვეტილება ასევე აუქმებს ყველა იმ ვიზაზე უარს, რომელიც მხოლოდ ამ პოლიტიკას ეფუძნებოდა და რომელიც იანვარში შევიდა ძალაში. ეს კი ქმნის იმის შესაძლებლობას, რომ ათასობით ძველი სავიზო განაცხადის ხელახლა განხილვა გახდეს საჭირო.
ტრამპის ადმინისტრაციას მოსამართლე ვარგასის გადაწყვეტილების გასაჩივრება შეუძლია.
აშშ-ის საიმიგრაციო სამსახურმა 75 ქვეყნისთვის, მათ შორის საქართველოსთვის, საიმიგრაციო ვიზების გაცემა 21 იანვრიდან შეაჩერა.
საიმიგრაციო ვიზებთან დაკავშირებული შეზღუდვა არ ეხებოდა სასწავლო, ტურისტულ და საქმიან ვიზებს. თუმცა, ტურისტულ და საქმიან ვიზებთან დაკავშირებით საქართველოსთვის შეერთებული შტატების სხვა შემზღუდავი ზომა – სავიზო დეპოზიტების პროგრამა მოქმედებს.
50 ქვეყნის, მათ შორის საქართველოს მოქალაქეებს ვიზაზე განაცხადის შეტანისას თანხის დეპოზიტზე შეტანა მოეთხოვებათ.
თავიდან პროგრამა საპილოტე იყო და საკონსულოს თანამშრომელს 5,10 ან 15 ათასი აშშ დოლარის დეპოზიტის მოთხოვნა შეეძლოთ. 3 აგვისტოდან პროგრამა მუდმივმოქმედი გახდა, დეპოზიტის თანხა კი 10, 15 და 20 ათასი დოლარით განისაზღვრა.
ამ პროგრამის ამოქმედების შემდეგ საქართველოს მოქალაქეებისთვის 10 წლიანი ვიზები აღარ გაიცემა და მხოლოდ მოკლევადიანი ვიზის მიღებაა შესაძლებელი.