2008 წლის 26 აგვისტოს რუსეთმა მის მიერ ოკუპირებული საქართველოს ტერიტორიების – აფხაზეთისა და ცხინვალის რეგიონის ე.წ. დამოუკიდებლობა აღიარა. დღეს რუსეთის საგარეო უწყების წარმომადგენელმა მარია ზახაროვამ საგარეო საქმეთა სამინისტროს ვებ-გვერდზე გამოქვეყნებული განცხადებით მარიონეტულ რეჟიმებს ეს თარიღი მიულოცა.
„26 აგვისტოს აფხაზეთისა და სამხრეთ ოსეთის ხალხები კიდევ ერთხელ აღნიშნავენ დღესასწაულს, რომელსაც მათი ბედისთვის განსაკუთრებული მნიშვნელობა აქვს — აფხაზეთის რესპუბლიკის დამოუკიდებლობის საერთაშორისო აღიარების დღეს და რუსეთის ფედერაციის მიერ სამხრეთ ოსეთის რესპუბლიკის სახელმწიფოებრივი დამოუკიდებლობის აღიარების დღეს.
რუსეთი მსოფლიოში პირველი ქვეყანა გახდა, რომელმაც 2008 წლის ამ დღეს აფხაზეთისა და სამხრეთ ოსეთის სუვერენიტეტი აღიარა. ამ გადაწყვეტილებით დასრულდა ორი რესპუბლიკის ხალხების თავდადებული ბრძოლა დამოუკიდებლობისთვის, ისინი გადაურჩნენ იმ განადგურებას, რომელიც მათ მაშინდელი საქართველოს დანაშაულებრივმა რეჟიმმა მოუმზადა, და საფუძველი ჩაეყარა საკუთარი ბედნიერი მომავლის მშენებლობას. „კოლექტიური დასავლეთის“ მხრიდან კონფლიქტის ესკალაციისკენ წაქეზების ფონზე რეგიონში ვითარების ნორმალიზებაში რუსეთის წვლილი ამ დღესასწაულს ჩვენი სახელმწიფოსთვისაც მნიშვნელოვანს ხდის.
ბოლო 18 წლის განმავლობაში რუსეთ-აფხაზეთისა და რუსეთ-სამხრეთ ოსეთის ურთიერთობები დინამიკურად ვითარდება. 2008 წლის 9 სექტემბერს მოსკოვმა სოხუმთან და ცხინვალთან დიპლომატიური ურთიერთობები დაამყარა, ხოლო 17 სექტემბერს მეგობრობისა და თანამშრომლობის შესახებ ხელშეკრულებები გააფორმა.
ამჟამად ჩვენ ახალგაზრდა რესპუბლიკებს სახელმწიფო ინსტიტუტების გაძლიერებაში, ეკონომიკისა და სოციალური სფეროს განვითარებასა და საერთაშორისო ავტორიტეტის ამაღლებაში ვეხმარებით. მიმდინარეობს მუშაობა ეროვნული კანონმდებლობების ჰარმონიზაციის, თავდაცვისა და უსაფრთხოების ერთიანი სისტემის ჩამოყალიბებისა და რეგიონთაშორისი თანამშრომლობის განვითარების მიმართულებით.
ვაპირებთ, მომავალშიც ფართომასშტაბიანი დახმარება გავუწიოთ მეგობარ ქვეყნებს სახელმწიფოებრიობის, უსაფრთხოებისა და ეკონომიკის განმტკიცებაში. ერთობლივი ძალისხმევით გავაგრძელებთ სტრატეგიული პარტნიორობისა და მოკავშირეობის გაძლიერებას, საერთო ტრადიციების, კულტურული მემკვიდრეობისა და სულიერი ღირებულებების შენარჩუნებას.
ძმურ რესპუბლიკებს — აფხაზეთსა და სამხრეთ ოსეთს — მშვიდობას, სიკეთესა და კეთილდღეობას ვუსურვებთ“ – ნათქვამია მარია ზახაროვას განცხადებაში.