იტალიასა და გერმანიას შორის უთანხმოება ხმელთაშუა ზღვაში გადარჩენილი მიგრანტების ბედთან დაკავშირებით მწვავდება, — წერს სააგენტო dpa.
იტალიის ვიცე-პრემიერმა და ტრანსპორტის მინისტრმა მატეო სალვინიმ ცოტა ხნის წინ განაცხადა, რომ თავშესაფრის საერთო ევროპული სისტემის (CEAS) წესების მიუხედავად, მისი ქვეყანა გერმანიიდან იტალიაში უკან გამოგზავნილ „არალეგალ მიგრანტებს“ არ მიიღებს, ვიდრე გერმანული ჰუმანიტარული ორგანიზაციების გემები ხმელთაშუა ზღვაში მიგრანტების გადარჩენას განაგრძობენ.
„გერმანიას არ აქვს უფლება, ჩვენთან არც ერთი არალეგალი მიგრანტი გამოგზავნოს, ვიდრე გერმანული არასამთავრობო ორგანიზაციების გემები ხმელთაშუა ზღვაში დაცურავენ და ათასობით არალეგალი მიგრანტი იტალიასა და ევროპაში ჩამოჰყავთ“, — ციტირებს გერმანული ყოველკვირეული Der Spiegel სალვინის განცხადებას. მემარჯვენე პარტია Lega-ს ლიდერმა ეს განცხადება ცოტა ხნის წინ ჩრდილოეთ იტალიის ქალაქ ტრენტოში გამართულ პარტიულ ღონისძიებაზე გააკეთა.
რომის მონაცემებით, მხოლოდ მიმდინარე წლის დასაწყისიდან გერმანული არასამთავრობო ორგანიზაციების გემებმა ხმელთაშუა ზღვაში 2200 მიგრანტი გადაარჩინეს და იტალიის პორტებში გადაიყვანეს. მათგან ზოგიერთმა მოგვიანებით იტალია დატოვა და ევროკავშირის სხვა ქვეყნებში, მათ შორის გერმანიაში, გაემგზავრა.
სალვინი აკრიტიკებს გერმანულ არასამთავრობო ორგანიზაციებს, რომლებიც მიგრანტებს გადაარჩენენ
თავშესაფრის საერთო ევროპული სისტემა (CEAS) ივნისში ამოქმედდა. ის გერმანიასა და ევროკავშირის სხვა ქვეყნებს დუბლინის შეთანხმების შესაბამისად აძლევს შესაძლებლობას, იტალიაში დააბრუნონ მიგრანტები, რომლებიც ევროკავშირის ტერიტორიაზე იტალიის სანაპიროს გავლით მოხვდნენ.
ამის მიუხედავად, CEAS-ის ამოქმედებიდან დღემდე იტალიას გერმანიიდან დაბრუნებული არც ერთი მიგრანტი არ მიუღია, — აღნიშნავს Der Spiegel.
ადრე, როდესაც მატეო სალვინი იტალიის შინაგან საქმეთა მინისტრი იყო, ის მუდმივად აკრიტიკებდა გერმანული არასამთავრობო ორგანიზაციების, მათ შორის Sea-Watch-ის საქმიანობას და აცხადებდა, რომ ისინი „კონტრაბანდისტებს ეხმარებიან მიგრანტების ხმელთაშუა ზღვის სახიფათო მარშრუტზე შეტყუებაში“, — იხსენებს Die Welt.
იტალიის მიერ ევროკავშირის სხვა ქვეყნებიდან დაბრუნებული მიგრანტების მიღებაზე უარის კომენტირებისას, ბუნდესტაგში მმართველი CDU/CSU-ის ფრაქციის საშინაო პოლიტიკის საკითხებში სპიკერმა ალექსანდერ ტრომმა გამოთქვა შეშფოთება, რომ ასეთმა ქმედებამ „შეიძლება ძირი გამოუთხაროს თავშესაფრის საერთო ევროპულ სისტემას, რომელიც სულ რამდენიმე კვირის წინ ამოქმედდა“.
მან ასევე გააფრთხილა ყველა, რომ ამან ევროპის სხვა ქვეყნებში შესაძლოა „ჯაჭვური რეაქცია“ გამოიწვიოს.
შესაძლოა იტალიისა და გერმანიის შინაგან საქმეთა მინისტრები მიგრაციის საკითხზე შეხვდნენ
როგორც dpa წერს, მატეო სალვინი იტალიის მთავრობის ერთადერთი წევრი არ არის, რომელიც რომის მიერ სხვა ევროპული ქვეყნებიდან დაბრუნებული მიგრანტების მიღებაზე უარს გამართლებულად მიიჩნევს.
ქვეყნის პრემიერ-მინისტრი ჯორჯა მელონი და შინაგან საქმეთა მინისტრი მატეო პიანტედოზიც ასევე საუბრობენ არსებული „დისბალანსის გამოსწორების“ აუცილებლობაზე.
იტალიური მხარე ამასთან ამტკიცებს, რომ საზღვაო სამართლის მიხედვით, გემებზე მოქმედებს იმ ქვეყნის კანონმდებლობა, რომლის დროშის ქვეშაც ისინი დაცურავენ. ამ არგუმენტის თანახმად, თუ გერმანული არასამთავრობო ორგანიზაციების გემები მიგრანტებს ბორტზე იღებენ, მათთვის ევროკავშირში შესვლის ქვეყანა გერმანია ხდება და არა იტალია.
გერმანიის ხელისუფლება, თავის მხრივ, არაერთხელ უსვამდა ხაზს ევროკავშირის ქვეყნების ერთობლივი მუშაობის აუცილებლობას მიგრანტების მიღებისა და განაწილების საკითხში.
ამასთან, იტალიიდან ჩასული მიგრანტების უკან დაბრუნების განზრახვის შესახებ უკვე განაცხადეს ევროპის სხვა ქვეყნებმაც, მათ შორის ავსტრიამ, შვეიცარიამ, ნიდერლანდებმა, შვედეთმა და ფინეთმა.
ოფიციალური მონაცემებით, 2023 წლიდან იტალიამ უარი თქვა დაახლოებით 80 000 მიგრანტის მიღებაზე, რომლებიც სხვა ქვეყნებიდან უკან უნდა დაებრუნებინათ. რომი ამის მიზეზად თავშესაფრის ეროვნული სისტემის გადატვირთულობას ასახელებდა.
იტალიური მედიის ინფორმაციით, მიგრაციის საკითხი მალე იტალიისა და გერმანიის შინაგან საქმეთა მინისტრების — მატეო პიანტედოზისა და ალექსანდერ დობრინდტის — შეხვედრაზე უნდა განიხილონ.