26 წლის ბელგიელი ავტომობილების გამყიდველი პრინცი გახდა მას შემდეგ, რაც ის ქვეყნის მეფის ძმის, პრინც ლორანის შვილად ოფიციალურად აღიარეს.
კლემან ვანდენკერკჰოვის დედა ბელგიელი მომღერალია, რომელსაც 1990-იან წლებში პრინც ლორანთან ურთიერთობა ჰქონდა. მან შვილს მამის ვინაობა მხოლოდ 16 წლის ასაკში, დაახლოებით ათი წლის წინ გაუმხილა.
ამ კვირაში ცნობილი გახდა, რომ დაახლოებით ექვსი თვის წინ, დნმ-ის ტესტის შედეგად სამეფო ოჯახთან ნათესაობის დადასტურების შემდეგ, ვანდენკერკჰოვი ოფიციალურად აღიარეს 63 წლის პრინც ლორანის შვილად და მემკვიდრედ. პრინცი ლორანი ბელგიის მეფე ფილიპის უმცროსი ძმაა.
ოფიციალური პროცედურა მოკრძალებულად, მუნიციპალიტეტში გაიმართა.
The Telegraph-ის ინფორმაციით, პრინცმა ლორანმა ვანდენკერკჰოვის მამობა ბელგიის სამოქალაქო რეესტრშიც ოფიციალურად დაარეგისტრირა.
ეს ოფიციალური აღიარება ახალ პრინცს აძლევს თანაბარ მემკვიდრეობის უფლებას პრინც ლორანის პირად ქონებაზე — ის ამ უფლებას იზიარებს თავის ნახევარდასთან, 20 წლის პრინცესა ლუიზთან, და ნახევარძმებთან — 20 წლის პრინც ნიკოლასთან და 19 წლის პრინც აიმერიკთან. ისინი პრინც ლორანისა და პრინცესა კლერის შვილები არიან; წყვილი 2003 წელს დაქორწინდა.
თუმცა კლემან ვანდენკერკჰოვი სამეფო შემწეობას არ მიიღებს, მას არც ოფიციალური სამეფო მოვალეობების შესრულება დაეკისრება და ბელგიის ტახტზე მემკვიდრეობის უფლება არ აქვს.
ვანდენკერკჰოვს შეუძლია მამის გვარი — საქს-კობურგი — მიიღოს, თუმცა მან მიანიშნა, რომ შესაძლოა ამის გაკეთება არ სურდეს.
„მე ვამაყობ გვარით ვანდენკერკჰოვი. თუ ამ გვარზე უარს ვიტყვი, ეს იქნება ღალატი ყველაფრის მიმართ, რაც დედაჩემმა ჩემთვის გააკეთა“, — უთხრა მან ცოტა ხნის წინ ფლამანდიურ გაზეთ Het Nieuwsblad-ს.
ვანდენკერკჰოვი 2000 წლის აგვისტოში დაიბადა. მისი დედაა ბელგიელი მომღერალი ვენდი ვან ვანტენი, რომლის ნამდვილი სახელია ირის ვანდენკერკჰოვი.
ის და პრინცი ლორანი ერთმანეთს 1990-იან წლებში, პარიზში გამართულ მოდის ჩვენებაზე შემთხვევით შეხვდნენ და გარკვეული პერიოდი ურთიერთობა ჰქონდათ. თუმცა მათი კავშირი დიდხანს არ გაგრძელებულა. წლების განმავლობაში არსებობდა ვარაუდი, რომ ამ ურთიერთობას ლორანის მამა, ბელგიის ყოფილი მეფე, არ ამტკიცებდა.
გასული წლის სექტემბერში ბელგიურ ტელეარხ VTM-ზე გასულ დოკუმენტურ ფილმში ვანდენკერკჰოვმა გაიხსენა მომენტი, როდესაც დედამ უთხრა, რომ მისი მამა პრინცი ლორანი იყო.
ამის შემდეგ ოთხი წელი გავიდა, სანამ ის მამას თავად დაუკავშირდებოდა და ეტყოდა, რაც დედისგან ჰქონდა გაგებული. პრინცი ლორანი დნმ-ის ტესტზე დათანხმდა.
„საავადმყოფოში ერთად წავედით. მახსოვს, მითხრა: ‘მე პირველი გავიკეთებ, რომ შენ უფრო მშვიდად იყო’,“ — უამბო ვანდენკერკჰოვმა VTM-ს.
მას შემდეგ, რაც მამობა დადასტურდა, ვანდენკერკჰოვის თქმით, მას და მამას შორის დაიწყო „ღია და გულწრფელი საუბრები“.
ეს პირველი შემთხვევა არ არის, როდესაც ბელგიის სამეფო ოჯახში წლების განმავლობაში დამალული საიდუმლო საჯარო ხდება.
ლორანის მამა, რომელიც ახლა 92 წლისაა, მრავალი წლის განმავლობაში იბრძოდა მამობის სარჩელის წინააღმდეგ, სანამ 2020 წელს არ აღიარა, რომ ქორწინებისგარეშე ურთიერთობის შედეგად ქალიშვილი შეეძინა.
დელფინ ბოელმა, რომელიც ახლა 58 წლისაა, საბოლოოდ სასამართლოში გაიმარჯვა და მას პრინცესის ტიტული მიენიჭა.
დღეს ის საკუთარ თავს დელფინ დე საქს-კობურგის სახელით წარადგენს.