ჰაკერებმა, რომლებიც ირანის ისლამური რევოლუციის გუშაგთა კორპუსთან (IRGC) არიან დაკავშირებული, უპრეცედენტო კიბერშეტევის შედეგად დიდ ბრიტანეთში ელექტროსადგური მწყობრიდან გამოიყვანეს, — იტყობინება 22 აგვისტოს გაზეთი The Telegraph. გამოცემის ცნობით, ეს პირველი შემთხვევაა, როდესაც ირანელ ჰაკერებს გაერთიანებულ სამეფოში მსგავსი ობიექტის მუშაობის შეჩერება შეძლეს.
ელექტროსადგური ოთხი დღის განმავლობაში არ მუშაობდა
უსაფრთხოების მოსაზრებებიდან გამომდინარე, ბრიტანეთის ხელისუფლებას არ დაუკონკრეტებია, კონკრეტულად რომელი ელექტროსადგური დაზარალდა. თუმცა ცნობილია, რომ ობიექტი ოთხი დღის განმავლობაში არ მუშაობდა, ვიდრე პერსონალი მისი ფუნქციონირების აღდგენას ცდილობდა.
ელექტროსადგური შედარებით მცირე ზომის იყო, ამიტომ შეფერხებას დიდ ბრიტანეთში ელექტროენერგიის საერთო მიწოდებასა და გამომუშავებაზე გავლენა არ მოუხდენია.
The Telegraph-ის თანახმად, თავდასხმის სავარაუდო მიზანი სამოქალაქო მოსახლეობისთვის რეალური ზიანის მიყენება კი არა, იმის დემონსტრირება იყო, რომ ირანის რეჟიმთან დაკავშირებულ ჰაკერებს შეუძლიათ ბრიტანულ სისტემებში შეღწევა და კრიტიკულად მნიშვნელოვანი ინფრასტრუქტურის ობიექტების მწყობრიდან გამოყვანა.
ინციდენტის შემდეგ ბრიტანეთის მთავრობამ ენერგეტიკული კომპანიების ხელმძღვანელებისთვის ბრიფინგი გამართა და საწარმოებს გაუგზავნა წერილები რეკომენდაციებითა და ენერგოსისტემის დაცვის შემდგომი მოქმედებების გეგმით.
მომხდარის შესახებ ინფორმაცია ასევე მიაწოდეს კიბერუსაფრთხოების ეროვნულ ცენტრს (NCSC), რომელიც საზოგადოებასთან თანამშრომლობს და კომპანიებს ეროვნული ინფრასტრუქტურის ობიექტების გარე საფრთხეებისგან დაცვის შესახებ რეკომენდაციებს აძლევს.
კიბერშეტევების სერია აშშ-ის წყალმომარაგების ობიექტებზე
The Telegraph-ის ინფორმაციით, ეს ინციდენტი ივლისში აშშ-ის წყალმომარაგების ობიექტებზე განხორციელებული კიბერშეტევების სერიას დაემთხვა.
მაშინ თავდამსხმელებმა 12 შტატში ათეულობით წყლის გამწმენდი ობიექტი მწყობრიდან გამოიყვანეს, რამაც დატბორვები და წყალმომარაგების ქსელში წნევის ვარდნა გამოიწვია. ზოგიერთ რეგიონში მოსახლეობას ურჩევდნენ, სასმელად გამოყენებამდე წყალი აედუღებინათ.
ირანმა დასავლეთის ქვეყნებზე კიბერშეტევები მნიშვნელოვნად გაააქტიურა მას შემდეგ, რაც თებერვალში აშშ-მა და ისრაელმა ირანის ტერიტორიაზე ავიადარტყმები დაიწყეს.
ირანის მხრიდან სავარაუდო თავდასხმების შესახებ ცნობები გავრცელდა გერმანიიდან, პოლონეთიდან, ფინეთიდან, ბელგიიდან და ალბანეთიდანაც, თუმცა ყველაზე ხშირ სამიზნეებად კვლავ ისრაელი და ახლო აღმოსავლეთის სხვა ქვეყნები რჩებიან.