იაკლი ღარიბაშვილი თავს მორალურად განადგურებულად მიიჩნევს. მითხრა, რომ მალე გააკეთებს განცხადებას კიდევ… წერილი გამოუგზავნა მამუკა მდინარაძემ. როგორც წერია, მდინარაძე იყო შემსრულებელი – ამის შესახებ ირაკლი ღარიბაშვილის ადვოკატმა განაცხადა, რომელმაც პატიმრობაში მყოფი ყოფილი პრემიერი რუსთავის ციხეში მოინახულა.
„არანაირი ზეწოლის ფაქტები არ ყოფილა. განადგურება არის როგორც ფიზიკური, ასევე მორალური. ირაკლი ღარიბაშვილმა განსაკუთრებით ამ ეტაპზე მორალურს გაუსვა ხაზი. რაც შეეხება წერილებს, ეს ალბათ ეტაპობრივად მოხდება, გაგრძელდება.
როდის იქნება ეს თქვენთვის გახდება ცნობილი – დაველოდოთ, ეს გაცხადდება. მეორე განცხადებაში მან ისაუბრა ამ წერილის ფაქტზე, საიდან და როგორ იყო. (კითხვა – რატომ გააქრო მისი განცხადებიდან ივანიშვილი?) ვინმე კი არ გააქრო ან მოიგონა. დაასახელა, რომ ეს წერილი მოდიოდა მამუკა მდინარაძისგან. ბატონმა ირაკლი ღარიბაშვილმა განაცხადა, რომ ეს წერილი რეალურად მიიღო და რომ ეს გამოუგზავნა მამუკა მდინარაძემ. როგორც წერია, მამუკა მდინარაძე იყო შემსრულებელი. მე არ ვიცი ვინ, ვის რა შეუტანა, მაგრამ მან ეს წერილი მიიღო. მან მითხრა, რომ ის მალე გააკეთებს განცხადებას კიდევ. როდის იგულისხმა მალეში, ეს არ ვიცი”. – განაცხადა ლილი გელაშვილმა.
შეგახსენებთ, ღარიბაშვილი თავის ორ წერილში ამბობს, რომ ივანიშვილის დავალებით მდინარაძემ გაუგზავნა წერილი, რომელშიც მას ახალი კორუფციული ბრალის აღიარებას სთავაზობდნენ იმის საგარანტიოდ, რომ აღარასდროს დაბრუნდება პოლიტიკაში.
მდინარაძე ამას უარყოფს და ამბობს, რომ მას შემდეგ, რაც კორუფციასთან უკომპრომისო ბრძოლა დაიწყო, მსგავსი ბრალდებები არ უკვირს.