19 აგვისტოს დილით უკრაინის კორუფციასთან ბრძოლის ეროვნულმა ბიურომ (НАБУ) და სპეციალიზებულმა ანტიკორუფციულმა პროკურატურამ (САП) ჩხრეკა ჩაატარეს პრეზიდენტის ოფისის ხელმძღვანელის მოადგილის, ირინა მუდრას და სახალხო დეპუტატ ვადიმ სტოლარის საცხოვრებელ მისამართებზე.
პარალელურად სამართალდამცველები სახელმწიფო ბანკ Sense Bank-შიც შევიდნენ.
ოპერაციას კოდური სახელი „Forrest Gump“ ეწოდა. გამოძიების სამიზნე გავლენიანი დანაშაულებრივი დაჯგუფებაა, რომელშიც, НАБУ-ს ვერსიით, მოქმედი და ყოფილი დეპუტატები, პრეზიდენტის ოფისის მაღალჩინოსნები და სახელმწიფო ბანკის ხელმძღვანელები ფიგურირებენ.
საქმე ეხება დანაშაულებრივი გზით მოპოვებული 150 მილიონი გრივნის ნაღდი ფულის ლეგალიზაციას. სქემის მონაწილეებმა ფიქტიური კომპანიების ანგარიშების გამოყენებით თანხა ლეგალურ ბრუნვაში შეიტანეს, რათა ის „მიდასის“ საქმეში ბრალდებული ენერგეტიკის ყოფილი მინისტრის, ჰერმან გალუშჩენკოს გირაოს გადასახდელად გამოეყენებინათ.
ანუ მარტივად – ენერგეტიკის ყოფილი მინისტრი ჰერმან გალუშჩენკო ბრალდებულია დიდ კორუფციულ სქემაში, რომლის დროსაც სახელმწიფო კომპანია ენერგოატომის კონტრაქტებიდან უკანონოდ იღებდნენ ფულს. მას 150 მილიონი გრივნა გირაო დაუნიშნეს. ირინა მუდრა და ვადიმ სტოლარი, გამოძიების ვერსიით, იმ ჯგუფში შედიოდნენ, რომელმაც ეს თანხა დანაშაულებრივი ფულიდან მოაგროვა, ფიქტიური კომპანიებისა და სახელმწიფო ბანკის მეშვეობით გაათეთრა და გალუშჩენკოს გირაო გადაიხადა, რომ ის ციხიდან გაეშვათ.
გამოძიების თანახმად, ჯგუფმა კონტროლი დაამყარა Sense Bank-ზე და მისი ტოპ-მენეჯმენტის მონაწილეობით ახორციელებდა უკანონო ტრანზაქციებს.
დღესვე, სპეცოპერაციის დაწყებიდან და ირინა მუდრას საცხოვრებელ სახლში ჩხრეკის ჩატარებიდან სულ რამდენიმე საათში, პრეზიდენტმა ვოლოდიმირ ზელენსკიმ ხელი მოაწერა ოფიციალურ განკარგულებას მუდრას თანამდებობიდან გათავისუფლების შესახებ.
ოპერაციას კოდური სახელი „Forrest Gump“ დაერქვა დანაშაულებრივი ჯგუფის წევრების მიერ ფარულ ჩანაწერებში ჰერმან გალუშჩენკოს დაუდევარი ფინანსური ქმედებების ირონიული შეფასების გამო. ფიგურანტები ექს-მინისტრის მიერ შვილის შვეიცარიულ კოლეჯში სწავლის არადეკლარირებულ დაფინანსებას „ფორესტ გამპს“, ანუ სულელურ შეცდომას ადარებდნენ, რის გამოც НАБУ-მ სპეცოპერაციას ეს კოდური სახელი მიანიჭა.