„საერთაშორისო გამჭვირვალობა – საქართველომ“ (TI) გამოაქვეყნა ანალიზი, რომელშიც შესწავლილია 2025 წლის ივნისის შემდეგ პროკურატურის მიერ დაწყებული გამოძიებები ყოფილი მაღალი თანამდებობის პირების წინააღმდეგ. ორგანიზაციის მონაცემებით, სულ 14 გამოძიება მიმდინარეობს, რომელთა ფიგურანტების უმეტესობა უკავშირდება ორ ჯგუფს — სახელმწიფო უსაფრთხოების სამსახურის ყოფილ უფროსს გრიგოლ ლილუაშვილს და ყოფილ პრემიერ-მინისტრს ირაკლი ღარიბაშვილს.
TI-ის შეფასებით, საგამოძიებო ორგანოები გამოიყენება „ქართული ოცნების“ შიგნით არსებული დაპირისპირების ფარგლებში, რადგან გამოძიება შერჩევითად ეხება პარტიის ყოფილ წევრებს. ორგანიზაცია აღნიშნავს, რომ პროცესის კონკრეტული მიზეზი დაუდგენელია და საჯაროდ ხელმისაწვდომი მტკიცებულებები ამის შესახებ ჯერჯერობით არ არსებობს.
ლილუაშვილის ჯგუფი
TI-ის ცნობით, 2025 წლის ივნისის შემდეგ პროკურატურამ დაიწყო 8 გამოძიება პირების მიმართ, რომლებიც უკავშირდებიან გრიგოლ ლილუაშვილს და 2019–2025 წლებში იკავებდნენ თანამდებობებს მასთან დაკავშირებულ სამინისტროებსა და სტრუქტურებში. გამოძიებები ეხება გრიგოლეთის გზაზე ჩამონგრეულ ხიდს (ზარალი 16 მილიონ ლარზე მეტი), „ლაგი კაპიტალის“ საქმეს (11 მილიონი ლარის ზარალი) და ალკოჰოლის უკანონო წარმოებას. ორგანიზაციის მონაცემებით, ჯამური ზარალი 32 მილიონ ლარს აღემატება.
- გრიგოლ ლილუაშვილი, სახელმწიფო უსაფრთხოების სამსახურის ყოფილი უფროსი — 2025 წლის 24 ოქტომბერს პროკურატურამ ჩაატარა ჩხრეკა მისსა და მასთან დაკავშირებულ პირთა საცხოვრებელ ბინებში, სადაც ამოღებულ იქნა 7,002,200 აშშ დოლარი და 136,000 ლარი ნაღდი ფული, 198 ერთეული ძვირფასი ნაკეთობა და საათი, დოკუმენტაცია და ტექნიკა. კონკრეტული ბრალდება არ არის დაზუსტებული.
- ირაკლი ქარსელაძე, რეგიონული განვითარებისა და ინფრასტრუქტურის ყოფილი მინისტრი — ჩატარდა ჩხრეკა.
- კობა გაბუნია, ინფრასტრუქტურის ყოფილი მინისტრის მოადგილე — დაკავებულია სამსახურებრივი უფლებამოსილების ბოროტად გამოყენების ბრალდებით, „ლაგი კაპიტალის“ საქმეში, სადაც 30 საბავშვო ბაღის მშენებლობისთვის გამოყოფილი 11,2 მილიონ ლარზე მეტიდან, TI-ის ცნობით, 9,36 მილიონი ლარი უკანონოდ იქნა მითვისებული.
- დავით ტაბიძე, მუნიციპალური განვითარების ფონდის ყოფილი აღმასრულებელი დირექტორი — შეეფარდა გირაო 300,000 ლარი, იმავე საქმეზე.
- ლევან კუპატაშვილი, საავტომობილო გზების დეპარტამენტის ყოფილი წარმომადგენელი — დაკავებულია გრიგოლეთის ხიდის საქმეზე, სადაც, TI-ის ცნობით, ყალბი დადასტურებების საფუძველზე კომპანიებმა თაღლითურად მიიღეს 5 მილიონ ლარამდე თანხა.
- ვლადიმერ ხუნდაძე, ფინანსთა სამინისტროს შემოსავლების სამსახურის ყოფილი უფროსის მოადგილე — დაკავებულია ალკოჰოლის უკანონო წარმოების საქმეზე (75,000-ზე მეტი ბოთლი).
- კობა ხუნდაძე, ვლადიმერ ხუნდაძის ძმა — დაკავებულია უკანონო შემოსავლის ლეგალიზაციის ბრალდებით; ჩხრეკისას ამოღებულია 1,319,300 აშშ დოლარი.
- ანდრია ლილუაშვილი, გრიგოლ ლილუაშვილის ბიძაშვილი — ჩატარდა ჩხრეკა.
- ბიჭიკო პაიკიძე, ვანის საკრებულოს „ქართული ოცნების“ დეპუტატი — დაუსწრებლად წარედგინა ბრალდება 4,184,249 ლარის მითვისებაში; არ იმყოფება საქართველოში.
ღარიბაშვილის ჯგუფი
პროკურატურამ იმავე პერიოდში დაიწყო 6 გამოძიება ირაკლი ღარიბაშვილთან დაკავშირებული პირების მიმართ. გამოძიებები ეხება სამხედრო ჰოსპიტლისთვის სამედიცინო აპარატურის შესყიდვას (სახელმწიფოს ზარალი 1,333,728 ლარი), უაქციზო სიგარეტის წარმოებას და დაუსაბუთებელი შემოსავლის საქმეებს.
- ირაკლი ღარიბაშვილი, ყოფილი პრემიერ-მინისტრი — ბრალი ედება უკანონო შემოსავლის ლეგალიზაციასა და მისი წარმომავლობის დამალვაში; შეეფარდა გირაო 1 მილიონი ლარი. TI-ის ცნობით, ჩხრეკისას მისი საცხოვრებელი სახლიდან ამოღებულია 6,5 მილიონი დოლარი.
- რომეო მიქაუტაძე, ეკონომიკის სამინისტროს ყოფილი მინისტრის მოადგილე — დაკავებულია სამსახურებრივი უფლებამოსილების ბოროტად გამოყენებისა და უკანონო შემოსავლის ლეგალიზაციის ბრალდებით.
- ჯუანშერ ბურჭულაძე, თავდაცვის ყოფილი მინისტრი — დაკავებულია სამხედრო ჰოსპიტლისთვის MRI აპარატის შესყიდვის საქმეზე, სადაც, TI-ის ცნობით, აპარატი შესყიდულია საბაზრო ღირებულებაზე დაახლოებით 1,33 მილიონი ლარით ძვირად.
- გიორგი ხაინდრავა, თავდაცვის მინისტრის ყოფილი მოადგილე — დაკავებულია იმავე საქმეზე.
- ვლადიმერ ღუდუშაური, თავდაცვის სამინისტროს შესყიდვების დეპარტამენტის ყოფილი უფროსი — შეეფარდა გირაო 10,000 ლარი, იმავე საქმეზე.
- ვასილ მხეიძე, ჯუანშერ ბურჭულაძის ცოლისძმა — დაკავებულია უაქციზო სიგარეტის წარმოების საქმეზე, სადაც ამოღებულია 323,851 კოლოფი უაქციზო სიგარეტი, ღირებულებით 2,176,341 ლარი.
- ნუგზარ ცაბაურაშვილი, ჯუანშერ ბურჭულაძის პირადი დაცვის წევრი — დაკავებულია იმავე საქმეზე.