ბრიუსელი ევროპული საბჭოს ორდღიან სამიტს მასპინძლობს. ევროკავშირის წევრი ქვეყნების პირველი პირები ეკონომიკურ დისბალანსზე, ენერგეტიკულ კრიზისზე, უკრაინის მხარდაჭერასა და ახლო აღმოსავლეთში შექმნილ მძიმე ვითარებაზე სამსჯელოდ შეიკრიბნენ.
საქართველო ამ შეხვედრის ოფიციალურ დღის წესრიგში არ ფიგურირებს. ეს სხდომის დაწყებამდე ევროკავშირის უმაღლესმა წარმომადგენელმა საგარეო საქმეთა და უსაფრთხოების პოლიტიკის საკითხებში, კაია კალასმა ჟურნალისტებსაც დაუდასტურა, თუმცა ასევე განაცხადა, რომ შავი ზღვისა და უსაფრთხოების საკითხებზე მსჯელობისას ეს თემები მაინც წამოიჭრება.
„დღეს საღამოს გაფართოების საკითხზე დისკუსია გვექნება. რეალურად, ჩვენ გვჭირდება, რომ ევროპაში მდებარე ქვეყნებთან ერთად უფრო ძლიერები ვიყოთ. ორშაბათს საგარეო საქმეთა მინისტრებთანაც გვქონდა დისკუსია გაფართოების უსაფრთხოების ასპექტებზე და იმაზე, თუ რა წვლილის შეტანა შეუძლიათ ამ ქვეყნებს ევროკავშირის უსაფრთხოების უზრუნველყოფაში გაწევრიანების შემდეგ. არ მგონია, რომ საქართველოს ან შავი ზღვის საკითხებზე სიღრმისეული დისკუსიები გვქონდეს, თუმცა, როგორც იცით, უსაფრთხოების საკითხების კონტექსტში ეს თემები მაინც წამოიჭრება. მაგრამ, დიახ, ძალიან ბევრი ისეთი საკითხია, რომელიც შეშფოთებას იწვევს“ – განაცხადა კაია კალასმა.
ბრიუსელიდან კვლავ მოუწოდებენ საქართველოს მთავრობას, საკუთარ ხალხს მოუსმინოს, რომელსაც ევროპული მომავალი სურს. ასეთი იყო ესტონეთის პრემიერ-მინისტრის კრისტენ მიხალის რჩევა. ევროპარლამენტის პრეზიდენტმა, რობერტა მეცოლამ კი „ევროსკოპის“ კითხვას, თუ რა გზავნილი აქვს იმ ქართველებისთვის, რომლებიც კვლავაც იბრძვიან ევროპული მომავლისთვის, მკაფიო მხარდაჭერით უპასუხა.
„არ დანებდეთ. ევროკავშირი ყოველთვის ღია იქნება იმ ხალხისთვის, ვინც მას იმედით შეჰყურებს – სწორედ ამას ვეუბნებით ყველა ქვეყანას. ჩვენ ასევე ველოდებით გაწევრიანების პროცესის დაჩქარებას – თითოეული ქვეყნის მიღწევებისა და დამსახურების შესაბამისად; სწორედ ამიტომ ვაგრძელებთ დიალოგს ყველა ქვეყანასთან“ – თქვა რობერტა მეცოლამ.
„უკრაინისა და მოლდოვის შემთხვევაში, სავსებით გასაგებია, რომ ექვსი კლასტერიდან ოთხი უკვე გავხსენით, თუმცა საჭიროა ყველა კლასტერის გახსნა, რათა მათზე წვდომა გვქონდეს და პროცესი გაგრძელდეს. საქართველოს მთავრობამ უნდა მოუსმინოს ხალხს, რომელსაც ევროპისკენ წასვლა სურს“ – განაცხადა კრისტენ მიხალიმ.
საქართველო ბრიუსელის ამჟამინდელ დღის წესრიგში არ არის, თუმცა, როგორც რამდენიმე დღის წინ ვროკავშირის საგარეო საქმეთა და უსაფრთხოების პოლიტიკის უმაღლესმა წარმომადგენელმა კაია კალასმა განაცხადა, ევროკავშირი საქართველოს საკითხს, მიმდინარე პოლიტიკური კრიზისისა და დემოკრატიული უკუსვლის ფონზე, ოფიციალურად იანვრის სხდომაზე დაუბრუნდება.