საზოგადოებრივი მოძრაობა “ერთად სახლში” და “ერთად სახლში საქართველო” პრეზიდენტის გადადგომის მოთხოვნით უწყვეტ აქციას იწყებს. მოძრაობა ავრცელებს ინფორმაციას იმის შესახებ, რომ “17 ივნისის 13.00 საათიდან ორგანიზაცია დაიწყებს უფასო კარტოფილის, როგორც ზურაბიშვილის გაპრეზიდენტების სიმბოლოს, დარიგებას. აქცია ამ ეტაპზე დაიწყება პრეზიდენტის სასახლესთან, თბილისში, ათონელის ქუჩაზე, სადაც განთავსდება კარტოფილით დატვირთული მიკროავტობუსი.
აქციის ორგანიზატორები მოუწოდებენ საქართველოს ყველა მოქალაქეს, ვინც არ ეთანხმება მარიონეტი ზურაბიშვილის თანამდებობაზე ყოფნას, ვისაც წაართვეს არჩევნები და დაუნიშნეს პრეზიდენტი, ჩაერთონ აქციაში და კარტოფილის წაღებით სიმბოლურად გამოხატონ სამოქალაქო პროტესტი.
აქციის მიზანია მოუწოდოს მოქალაქეებს არ შეეგუონ ოლიგარქის მიერ თავსმოხვეულ პრეზდენტს და იბრძოლონ მის გადასაყენებლად.
არის სალომე შენი პრეზიდენტი? არა! მოდი აქციაზე!“– ნათქვამია მოძრაობის მიერ გავრცელებულ ინფორმაციაში.
