62 წლის ასაკში შერონ სტოუნმა პირველად მოსინჯა ბედი მხატვრობაში. ამის მიზეზი კარანტინი გახდა, რომელშიც მსოფლიოს მილიონობით ადამიანის მსგავსად შერონ სტოუნიც აღმოჩნდა გამოკეტილი. ჰოლივუდის ვარსკვლავი თვითიზოლაციის პირობებში არ იწყენს და დროს ლოს ანჯელესში მდებარე მშვენიერ სახლში ატარებს. მან ინსტაგრამის ხელმომწერებს ვიდეო შესთავაზა, რომელზეც საკუთარ ნახატს აჩვენებს. მსახიობმა ვარდისფერი პიონები დახატა.
“დავასრულე ჩემი პირველი ნახატი. როგორ მიხარია! ეს რაღაცას გავს. შეგიძლიათ რამე გააკეთოთ, სანამ სახლში ხართ და არ იცით რით დაკავდეთ. ეს ჩემი პირველი ნაბიჯია რაღაც ახლის შესწავლისკენ“– ამბობს მსახიობი.
ფანატების ნაწილის ყურადღება მსახიობის ნახატზე მეტად მისმა ჩაცმულობამ მიიქცია. წითელი სვიტრისგან და თეთრი მინი შორტებისგან შემდგარ ანსამბლში მსახიობი მშვენივრად გამოიყურებოდა და დაუდევრად შეკრული თმაც უხდებოდა.
სტოუნს ვიდეოზე კომენტარი ნაომი ქემფბელმაც დაუწერა:“ საოცარი!“ – ეს იყო კომენტარი, რომელსაც თან გულები ახლდა.
ინსტაგრამის მომხმარებლებმა კომპლიმენტები არ დაიშურეს როგორც მისი გარეგნობის, ისე ახალი გატაცების მიმართ.
სტოუნი შეწუხებულია კორონავირუსის პანდემიით, რომელმაც მსოფლიო მოიცვა. მან მაყურებელს მიმართა სიფხიზლე და ოპტიმიზმი შეინარჩუნონ.
