მოეთხოვება პასუხი შესაბამის კომპანიებს, რომლებიც მუშაობდნენ! – კალაძე ვაკის პარკში მომხდარ შემთხვევაზე

“ყველაფერი უნდა იყოს გათვალისწინებული, რა თქმა უნდა, მოეთხოვება [პასუხი] შესაბამის კომპანიებს, რომლებიც მუშაობდნენ”. – ასე ეხმაურება თბილისის მერი, კახა კალაძე ვაკის პარკში მომხდარ შემთხვევას.

ცოტა ხნის წინ, ახლადეაბილიტირებულ ვაკის პარკში თამაშისას ბავშვებს ბურთი შადრევანში ჩაუვარდათ, მის ამოსაღებად შადრევანში ჩასულ ბავშვს კი დენმა დაარტყა. დაშავდა მის დასახმარებლად ჩასული ორი მეგობარიც. ბავშვები ხეჩინაშვილის კლინიკაში, შოკის მდგომარეობაში იმყოფებიან. კლინიკაში ამბობენ, რომ ორივე ბავშვის მდგომარეობა მძიმეა.მესამე არასრულწლოვანი კი იაშვილის კლინიკაშია გადაყვანილი.

შინაგან საქმეთა სამინისტრომ ვაკის პარკში მომხდარ შემთხვევაზე გამოძიება დაიწყო. მომხდარზე სსკ-ის 240-ე პრიმა მუხლის 1-ლი ნაწილით მიმდინარეობს, რაც ობიექტზე უსაფრთხოების წესების დარღვევას გულისხმობს, რამაც ჯანმრთელობის ნაკლებად მძიმე ან მძიმე დაზიანება გამოიწვია.

12 ოქტომბერს მერიამ გაავრცელა ინფორმაცია, რომ თბილისის მერიის გარემოს დაცვის საქალაქო სამსახურმა ვაკის პარკში არსებული მცირე კასკადისა და მრგვალი შადრევნის რეაბილიტაცია დაასრულა.  მერიის ინფორმაციით, რეაბილიტაციის ფარგლებში, მთლიანად შეიცვალა წყალმომარაგების სისტემა –  დამონტაჟდა თანამედროვე ტექნოლოგია, რომელიც ავტომატიზებულია. ასევე, მოეწყო განათების სისტემა.

დასრულებულ სამუშაოებს დედაქალაქის მერი კახა კალაძე საკრებულოს თავმჯდომარესთან, ვაკის რაიონის მაჟორიტარ დეპუტატ გიორგი ტყემალაძესთან ერთად გაეცნო.