საქართველოს ყოფილი პრეზიდენტი, მიხეილ სააკაშვილი კლინიკა „ვივამედში“ გადაყვანაზე თანახმაა. შესაბამისი განცხადება, ენმ-ს წევრმა, კობა ნაყოფიამ ჟურნალისტებთან, სააკაშვილის მონახულების შემდეგ გააკეთა. ასევე ნაყოფია აცხადებს, რომ მიუხედავად “ვივამედში” გადაყვანაზე ექსპრეზიდენტის თანხმობისა, მას დღეს არ გადაიყვანენ რადგან დღეს სააკაშვილს ოჯახის წევრების ნახვის დღე აქვს.
„მიხეილ სააკაშვილის ჯანმრთელობის მდგომარეობა საკმაოდ მძიმეა. მიხეილ სააკაშვილისთვის ცნობილია იუსტიციის მინისტრის შეთავაზებაზე. მას უკვე აცნობეს რომ ის იქნებოდა გადაყვანილი. უბრალოდ აქ არის ერთი მნიშვნელოვანი დეტალი, საუბარია მხოლოდ გამოკვლევებზე გადაყვანაზე. შესთავაზეს რომ ეს მომხდარიყო დღეს, რაზეც უთხრა რომ დღეს ვერ წავიდოდა, რადგან დღეს ის უიშვიათესი დღეა, როცა მას ეძლევა შესაძლებლობა შეხვდეს ოჯახის წევრებს. ამის გამო მოუწია მას ამ შემოთავაზებაზე უარის თქმა. ეს შეეხება მხოლოდ კვლევების ჩატარებას, არანაირ მკურნალობაზე და გადაყვანაზე მკურნალობის მიზნით საუბარი არაა – რაც მას პირადად უთხრეს. ის ზოგადად უსმენს ექიმების რეკომენდაციას. მე გაოცებული ვარ განცხადებით, რომ თითქოს მიშა საკვებს არ იღებს, ეს დიდი სიცრუეა. დიდი განსხვავებაა საკვების არმიღებასა და ვერ მიღებას შორის. მომდევნო დღეებში მზადაა გასაყვანად, დღეს ვერ წავიდოდა, რადგან შეხვედრა ჰქონდა ოჯახთან ,რომელიც დიდი ხანია არ უნახავს. ყველანაირ შეთავაზებას ის განიხილავს და აუცილებლად გადავა კვლევების ჩასატარებლად“ – აცხადებს კობა ნაყოფია.
ცნობისთვის, დღეს 10 მაისს საქართველოს იუსტიციის მინისტრმა რატი ბრეგაძემ მიხეილ სააკაშვილს კლინიკა „ვივამედში“ გადაყვანა შესთავაზა, სადაც ჩაუტარდება გამოკვლევები და საჭიროების შემთხვევაში გაეწვევა მკურნალობა.
