ბრიტანეთის მთავრობამ რუსეთის წინააღმდეგ სანქციების ახალი პაკეტი შემოიღო. ლონდონი ამის მიზეზად ასახელებს რუსეთის მხრიდან მიმდინარე მტრულ საქმიანობას, მათ შორის სომხეთის შიდა პოლიტიკურ პროცესებში სავარაუდო ჩარევას ქვეყნის მოახლოებული საპარლამენტო არჩევნების წინ.
სანქციების პაკეტი, რომელიც 11 მაისს გამოცხადდა, ლონდონმა წარმოადგინა როგორც რუსეთის წინააღმდეგ დაწესებული ერთ-ერთი ყველაზე მკაცრი ზომების ნაკრები უკრაინაში ომის დაწყების შემდეგ. საერთო ჯამში, სანქცირებულთა სიას 56 ფიზიკური პირი და ორგანიზაცია დაემატა.
ბრიტანეთის ხელისუფლების მტკიცებით, სანქცირებულ სუბიექტთა ნაწილი ჩართული იყო კრემლთან დაკავშირებულ გავლენისა და დეზინფორმაციის კამპანიებში, მათ შორის ოპერაციებში, რომლებიც, სავარაუდოდ, სომხეთის შიდა პოლიტიკური პროცესების ფორმირებასა და პრორუსული გავლენის გაძლიერებას ისახავდა მიზნად.
ერთ-ერთი ორგანიზაცია, რომლის წინააღმდეგაც სანქციები დაწესდა, არის Social Design Agency (SDA). ბრიტანული განცხადების თანახმად, ეს ორგანიზაცია რუსეთის პრეზიდენტის ადმინისტრაციის მითითებით მოქმედებდა. ლონდონი ჯგუფს ადანაშაულებს სომხეთში მოსკოვისთვის ხელსაყრელი ქსელებისა და პოლიტიკური გავლენის სტრუქტურების შექმნის მცდელობაში.
კიდევ ერთი სუბიექტი — Structura — ასევე დაადანაშაულეს კოორდინირებულ ოპერაციებში მონაწილეობაში, რომელთა მიზანიც დემოკრატიული ინსტიტუტების შესუსტება და უკრაინისადმი საერთაშორისო მხარდაჭერისთვის ძირის გამოთხრა იყო.
სანქციები შეეხო ორგანიზაცია „დიალოგსაც“, რომელსაც ბრიტანელი ოფიციალური პირები რუსეთთან დაკავშირებულ პროპაგანდისა და გავლენის ქსელად აღწერენ. განცხადების თანახმად, ორგანიზაცია, სავარაუდოდ, მართავდა ონლაინ პლატფორმებს, რომლებიც კრემლის ნარატივებს ავრცელებდა, და რუსულ სადაზვერვო სამსახურებთან თანამშრომლობდა გავლენის კამპანიებში, მათ შორის სომხეთის შიდა პოლიტიკურ გარემოსთან დაკავშირებულ მცდელობებში.
ბრიტანეთის განცხადება სომხეთში მიმდინარე საპარლამენტო საარჩევნო კამპანიის ფონზე გაკეთდა, რომელიც ოფიციალურად 8 მაისს დაიწყო. კამპანია 5 ივნისამდე გაგრძელდება, 6 ივნისი კი კანონით განსაზღვრული სიჩუმის დღე იქნება 7 ივნისის კენჭისყრამდე.
