უკრაინის პრეზიდენტის, ვოლოდიმირ ზელენსკის განცხადებით, უკრაინელმა სამხედროებმა შაბათს ღამით ვოლგოგრადში მდებარე საწარმო „ტიტან-ბარიკადებზე“ FP-5 ტიპის „ფლამინგოს“ რაკეტებით დარტყმა განახორციელეს.
მისი თქმით, თავდასხმის სამიზნე იყო დიდი სამრეწველო კომპლექსი, სადაც იწარმოება საარტილერიო სისტემები და სპეციალური სამხედრო ტექნიკა, მათ შორის სარაკეტო გამშვები დანადგარების ელემენტები. ზელენსკის თქმით, დარტყმის შემდეგ ქარხნის ტერიტორიაზე ხანძარი გაჩნდა.
ვოლგოგრადის ოლქის გუბერნატორმა ანდრეი ბოჩაროვმა განაცხადა, რომ „მაღალსიჩქარიანი საჰაერო სამიზნეების“ შეტევა მოიგერიეს, თუმცა ერთ-ერთი საწარმოს საწარმოო ობიექტები დაზიანდა. მისივე ცნობით, დაშავდა 10 ადამიანი, საცხოვრებელი სახლები კი არ დაზიანებულა.
ღია წყაროების თანახმად, „ტიტან-ბარიკადები“ თავდაცვითი მრეწველობის საწარმოა, რომელიც სარაკეტო და საარტილერიო ტექნიკაზე მუშაობს. უკრაინის გენშტაბის ინფორმაციით, იქ იწარმოება „ისკანდერ-М“-ის, „ტოპოლ-М“-ისა და „იარს“-ის სისტემებისთვის განკუთვნილი დანადგარები, ასევე დიდი კალიბრის ჰაუბიცები.
ზელენსკიმ განაცხადა, რომ „ყოველი რუსული თავდაცვითი ობიექტი, რომელიც უკრაინის წინააღმდეგ ომს ემსახურება, სამართლიანი სამიზნეა“.
