რუსეთის უშიშროების საბჭოს თავმჯდომარის მოადგილემ და პარტია „ერთიანი რუსეთის” თავმჯდომარემ დმიტრი მედვედევმა ოკუპირებულ ცხინვალში გამომავალ გაზეთ „Южная Осетия”-სთვის ინტერვიუ მისცა, რომელშიც 2008 წლის აგვისტოს ომის დაწყება დასავლეთსა და საქართველოს ყოფილ პრეზიდენტს, მიხეილ სააკაშვილს დააბრალა. ინტერვიუ გამოქვეყნდა 25 აგვისტოს.
მედვედევის განცხადებით, 1990-იანი წლების დასაწყისში საქართველოს ხელისუფლების „დანაშაულებრივმა გადაწყვეტილებებმა” სამხრეთ ოსეთსა და აფხაზეთში მშვიდობიანი მოსახლეობის მასობრივი ხოცვა გამოიწვია. მისივე თქმით, 2008 წელს სააკაშვილთან შეხვედრებზე უკანასკნელი მოლაპარაკებების გაგრძელებასა და კონფედერაციული მოწყობის შესაძლებლობაზე საუბრობდა, თუმცა შემდეგ, როგორც მედვედევი ირწმუნება, „არაპროვოცირებული აგრესია” განახორციელა, რის შემდეგაც რუსეთმა „საქართველოს მშვიდობისკენ იძულების ოპერაცია” ჩაატარა. ქართველი სამხედროები, რომლებიც ომში მონაწილეობდნენ, მან „სააკაშვილის ბოევიკები” უწოდა.
“1990-იანი წლების დასაწყისში საქართველოს ხელისუფლების დანაშაულებრივმა გადაწყვეტილებებმა სამხრეთ ოსეთსა და აფხაზეთში მშვიდობიანი მოსახლეობის მასობრივი ხოცვა გამოიწვია. 2008 წელს სააკაშვილთან შეხვედრები მქონდა. ის მარწმუნებდა, რომ მოლაპარაკების მაგიდასთან დაჯდომას და აფხაზებისა და ოსების ინტერესების გათვალისწინებას აპირებდა. მზად ვიყავი, ხელი შემეწყო დაახლოების პროცესისთვის, რათა საქართველოს, რომელიც, ფაქტობრივად, რამდენიმე ნაწილად იყო დაყოფილი, საკუთარი საზღვრების შენარჩუნება შეძლებოდა. კონფედერაციის ან რაიმე სხვა ფორმატის ფარგლებში.
თუმცა სააკაშვილის რეჟიმმა არაპროვოცირებული და არაფრით გამართლებული აგრესია განახორციელა. დაიღუპა ჩვენი ათობით სამშვიდობო და ასობით მშვიდობიანი მოქალაქე.
მოსკოვი იძულებული გახდა, საქართველოს მშვიდობისკენ იძულების ოპერაცია ჩაეტარებ
რუსეთის ექსპრეზიდენტის თქმით, აღნიშნული „ოპერაციის” შემდეგ საჭირო გახდა სამხრეთ ოსეთისა და აფხაზეთის დამოუკიდებლობის აღიარება, რაც მისივე შეფასებით, ამ რეგიონების „ეროვნულ-განმათავისუფლებელი ბრძოლის” დასრულებას და ახალი გეოპოლიტიკური რეალობის დამყარებას ნიშნავდა.
მედვედევმა ასევე ისაუბრა 2008 წელს საქართველოში, მისი თქმით, ამერიკელი და ევროპელი სამხედრო მრჩევლების ყოფნაზე, რომელთა მიზანიც, მისივე მტკიცებით, „ომის გაჩაღება და რუსეთის დასუსტება” იყო — ეს მტკიცება დამოუკიდებელი წყაროებით არ დასტურდება.
ინტერვიუში მედვედევმა ვოლოდიმირ ზელენსკის „ნეონაცისტი და ტერორისტი” უწოდა და განაცხადა, რომ მას სააკაშვილის „არანაკლებ სევდიანი ბედი” ელის. მან ასევე NATO-ს „მტრული სამხედრო-პოლიტიკური ბლოკი” უწოდა და გაიმეორა რუსეთის პოზიცია, რომ საქართველოსა და უკრაინის ალიანსში გაწევრიანება რუსეთისთვის მიუღებელია.
მედვედევმა ისაუბრა ოკუპირებული ცხინვალის რეგიონისა და რუსეთის თანამშრომლობაზეც. მისივე თქმით, 2026 წლის 9 მაისს რუსეთისა და დე ფაქტო სამხრეთ ოსეთის ხელისუფლებებმა ხელი მოაწერეს შეთანხმებას, რომელიც საგარეო პოლიტიკის, თავდაცვისა და უსაფრთხოების სფეროებში თანამშრომლობის გაღრმავებას, აგრეთვე კაპიტალის, საქონლისა და სამუშაო ძალის თავისუფალ გადაადგილებას ითვალისწინებს. მედვედევმა ასევე დაასახელა რუსი სამხედროების ყოფნა რეგიონში „აქტუალურად”, იმ ფონზე, როცა თბილისი უარს ამბობს სამხრეთ ოსეთის მიმართ ძალის გამოუყენებლობის გარანტიის გაცემაზე.