საქართველოში „რუსოფობიის მონიტორინგის საბჭო“ შეიქმნა. მისი მონაწილეები აცხადებენ, რომ ახალი საზოგადოებრივი ინიციატივის მთავარი ამოცანა საჯარო სივრცეში დისკრიმინაციის, სიძულვილის ენისა და ანტირუსული რიტორიკის შემთხვევების გამოვლენა და ანალიზია. ინიციატივა პრორუსულ ორგანიზაციებს, მათ შორის, „ევრაზიის ინსტიტუტს“ ეკუთვნის.
„რუსოფობიის მონიტორინგის საბჭოს“ მიზნებზე კრემლის სახელმწიფოებრივი პროპაგანდისტული პლატფორმა „სპუტნიკი“ წერს. გამოცემის ცნობით, საბჭო შეაგროვებს ინფორმაციას იმ ფაქტების შესახებ, რომლებსაც რუსოფობიის გამოვლინებად მიიჩნევს: რუსეთის შესახებ არასწორი ინფორმაციის გავრცელებიდან და ისტორიული მოვლენების დამახინჯებიდან დაწყებული, ენობრივი ან ეთნიკური ნიშნით დისკრიმინაციით დამთავრებული. მონიტორინგი შეეხება ექსკლუზიურად ფიზიკური და იურიდიული პირების საჯარო განცხადებებს, პუბლიკაციებსა და ქმედებებს.
საბჭოსთან ასევე იმუშავებს იურისტთა ჯგუფი, რომელიც სამართლებრივ შეფასებას მისცემს გამოვლენილ შემთხვევებს და საჭიროების შემთხვევაში შესაბამის მიმართვებს, მათ შორის, სააპელაციო საჩივრებს მოამზადებს. მონიტორინგის შედეგების გამოქვეყნება სამ თვეში ერთხელ იგეგმება.
ინიციატივის ავტორები აღნიშნავენ, რომ განსაკუთრებულ ყურადღებას დაუთმობენ 2022 წლის თებერვლის შემდეგ მომხდარ მოვლენებსა და გაკეთებულ განცხადებებს. მათ მიაჩნიათ, რომ ბოლო წლებში საქართველოში ანტირუსული გამონათქვამებისა და აქციების რაოდენობა საგრძნობლად გაიზარდა.
ორგანიზატორებმა ქვეყნის ხელისუფლებას მოუწოდეს, ხელი შეუწყონ ქსენოფობიისა და
დისკრიმინაციის ყველა ფორმის წინააღმდეგ ბრძოლას და ხაზგასმით აღნიშნეს, რომ ეროვნული და ენობრივი მრავალფეროვნების პატივისცემის შენარჩუნება სოციალური სტაბილურობის მნიშვნელოვან პირობად რჩება
- კრემლის „რბილი ძალა“ საქართველოში: რა არის „ევრაზიის ინსტიტუტი“ და რა მიზნებს ემსახურება ის?
წლების განმავლობაში ჩატარებული მედიამონიტორინგისა და საგამოძიებო კვლევების მიხედვით, „ევრაზიის ინსტიტუტი“ წარმოადგენს კრემლის „რბილი ძალის“ კლასიკურ ინსტრუმენტს, რომლის მთავარი ამოცანა ქვეყნის საგარეო კურსის დივერსიაა. ორგანიზაცია მჭიდროდ არის დაკავშირებული რუსეთის სახელისუფლებო წრეებთან. მაგალითად, რუსეთის სტრატეგიული კვლევების ინსტიტუტთან, რომელიც პირდაპირ რუსეთის პრეზიდენტის ადმინისტრაციას ექვემდებარება და პოსტსაბჭოთა ქვეყნებში გავლენის ოპერაციებს გეგმავს.
„ევრაზიის ინსტიტუტი“ მიზანმიმართულად მუშაობს საქართველოს ევროატლანტიკური მისწრაფებების დისკრედიტაციაზე, საზოგადოების პოლარიზაციასა და ქვეყნის საგარეო პოლიტიკური ვექტორის შეცვლაზე. ორგანიზაცია აცხადებს, რომ მისი მიზანია „რუსეთთან სრულფასოვანი თანამშრომლობა“, რაც პრაქტიკაში სწორედ ნატოსა და ევროკავშირთან ინტეგრაციაზე უარის თქმას ნიშნავს.
