აშშ-ის შეიარაღებულმა ძალებმა ირანზე დარტყმები განაახლეს მას შემდეგ, რაც თეირანმა ორმუზის სრუტის თავზე ამერიკული Apache-ის ტიპის საბრძოლო ვერტმფრენი ჩამოაგდო. ირანული მედია ქვეყნის სამხრეთში აფეთქებების შესახებ იუწყება. ირანის საგარეო საქმეთა მინისტრი აბას არაღჩი ვაშინგტონს თავდასხმაზე პასუხით დაემუქრა.
„ეს ოპერაცია არის პროპორციული პასუხი ირანის დაუსაბუთებელ აგრესიაზე“, — განაცხადა აშშ-ის ცენტრალურმა სარდლობამ, CENTCOM-მა, სოციალურ ქსელ X-ში.
U.S. Central Command (CENTCOM) forces began launching self-defense strikes against Iran at 5 p.m. ET today at the Commander in Chief’s direction, in response to yesterday’s downing of a U.S. Army Apache helicopter. The mission is a proportional response to unjustified Iranian…
— U.S. Central Command (@CENTCOM) June 9, 2026
აშშ-ის პრეზიდენტმა დონალდ ტრამპმა ABC News-თან ინტერვიუში თქვა, რომ პასუხი აუცილებელი იყო.
„პასუხი უნდა იყოს ძალიან ძლიერი, ძალიან მძლავრი, და სწორედ ასეთი არის ის ახლა“, — განაცხადა მან.
ირანული მედია ქვეყნის სამხრეთში აფეთქებების შესახებ იუწყება
ამერიკული გამოცემა Axios-ის ცნობით, აშშ-ის შეიარაღებული ძალების სამიზნე გახდა ირანის რამდენიმე საჰაერო თავდაცვის სისტემა და რადიოლოკაციური სადგური ორმუზის სრუტის რაიონში.
ირანულმა მედიამ ირანის სამხრეთ სანაპიროზე, ორმუზის სრუტის მახლობლად, აფეთქებების შესახებ გაავრცელა ინფორმაცია. ნახევრად ოფიციალური სააგენტო Tasnim-ის ცნობით, აფეთქებების ხმა ისმოდა ქალაქებში — სირიკსა და მინაბში, ასევე კუნძულ ქეშმზე.
ირანის საგარეო საქმეთა მინისტრი აბას არაღჩი ვაშინგტონს თავდასხმაზე პასუხით დაემუქრა.
Despite its defeats on the battlefield, the U.S. opted to test our determination.
Our Powerful Armed Forces will leave no attack or threat unanswered.
Leave our region if you want to be safe.
History of the Persian Gulf has many chapters on dire fates of intruding outsiders. pic.twitter.com/O17GGtklxA
— Seyed Abbas Araghchi (@araghchi) June 9, 2026
„მიუხედავად ბრძოლის ველზე საკუთარი მარცხებისა, აშშ-მა გადაწყვიტა ჩვენი სიმტკიცე გამოეცადა. ჩვენი ძლიერი შეიარაღებული ძალები არც ერთ თავდასხმას ან მუქარას უპასუხოდ არ დატოვებენ. დატოვეთ ჩვენი რეგიონი, თუ უსაფრთხოდ ყოფნა გსურთ“, — დაწერა მან სოციალურ ქსელ X-ში.
სააგენტო Tasnim-მა მოგვიანებით გაავრცელა ისლამური რევოლუციის გუშაგთა კორპუსის — IRGC-ის — განცხადება, რომლის მიხედვითაც ირანმა რეგიონში აშშ-ის სამიზნეების მიმართულებით რაკეტები და უპილოტო საფრენი აპარატები გაუშვა.
რამდენიმე საათის შემდეგ CENTCOM-მა განაცხადა, რომ ირანზე დარტყმები დასრულდა. სარდლობის ცნობით, ამერიკელმა სამხედროებმა იერიშები მიიტანეს ირანის საჰაერო თავდაცვის ობიექტებზე, სახმელეთო მართვის პუნქტებსა და რადიოლოკაციურ სადგურებზე ორმუზის სრუტის მახლობლად.
Apache-ის ვერტმფრენი შესაძლოა ირანულ დრონთან შეჯახების გამო ჩამოვარდა
მანამდე ტრამპი საკუთარ სოციალურ ქსელ Truth Social-ში ირანს Apache-ის ვერტმფრენის ჩამოვარდნის გამო საპასუხო ზომებით დაემუქრა. თეთრი სახლის ხელმძღვანელის თქმით, ვერტმფრენი ირანელმა სამხედროებმა ჩამოაგდეს მაშინ, როდესაც ის ორმუზის სრუტეს პატრულირებდა. ტრამპის განცხადებით, ორივე პილოტი უვნებლად გადარჩა და უსაფრთხო ადგილას იმყოფება.
ამერიკელმა ოფიციალურმა პირმა Associated Press-ს ანონიმურობის პირობით უთხრა, რომ აშშ-ის შეიარაღებული ძალების ვერტმფრენი ირანულ უპილოტო საფრენ აპარატთან შეჯახების შემდეგ ჩამოვარდა. იყო თუ არა ეს შეჯახება განზრახ გამოწვეული, ჯერჯერობით უცნობია. ოფიციალურ განცხადებებში ეს ვერსია ნახსენები არ არის.
საბრძოლო მოქმედებები გამოცხადებული ზავის მიუხედავად გრძელდება
ბოლო რამდენიმე დღის განმავლობაში რეგიონში საბრძოლო მოქმედებები არაერთხელ გამწვავდა, მიუხედავად იმისა, რომ აშშ-ისა და ისრაელის ირანის წინააღმდეგ ომში ცეცხლის შეწყვეტის რეჟიმი მოქმედებს. 7 ივნისის საღამოს ირანმა აპრილის დასაწყისის შემდეგ პირველად გაუშვა რაკეტები ისრაელის მიმართულებით. IRGC-მა იერიშის მიზეზად დაასახელა ისრაელის ავიადარტყმები ბეირუთის იმ რაიონებზე, რომლებიც პროირანული დაჯგუფება „ჰეზბოლას“ საყრდენებად მიიჩნევა.
საპასუხოდ ისრაელმაც განაახლა თავდასხმები ირანში მდებარე სამიზნეებზე. 8 ივნისს ისრაელმა და ირანმა საბრძოლო მოქმედებების დროებით შეწყვეტის შესახებ განაცხადეს.
ირანის წინააღმდეგ Apache-ის ჩამოგდების გამო საპასუხო ზომების გამოცხადებამდე რამდენიმე საათით ადრე დონალდ ტრამპმა განაცხადა, რომ თეირანთან სამშვიდობო შეთანხმება ხელმისაწვდომი გახდა.
„ჩვენ ვართ იმ პროცესის საბოლოო ეტაპზე, რაც ძალიან, ძალიან კარგი შეთანხმება იქნება“, — აღნიშნა მან.
აშშ-ის პრეზიდენტმა დაამატა, რომ ირანთან მოლაპარაკებები შესაძლოა უახლოეს „ორ-სამ დღეში“ დასრულდეს.
