გერმანიაში სამუშაო ძალის დეფიციტი 2036 წლისთვის 4,3 მილიონი ადამიანით გაიზრდება — ამის მიზეზი ბეიბი-ბუმერების თაობის პენსიაზე გასვლაა. ასეთი პროგნოზი ორშაბათს, 15 ივნისს, კიოლნში მდებარე გერმანიის ეკონომიკის ინსტიტუტმა — IW-მ — გამოაქვეყნა. მიზეზი ბეიბი-ბუმერების თაობის პენსიაზე გასვლაა — ანუ იმ ადამიანების, რომლებიც 1954-1969 წლებში დაიბადნენ.
ეკონომისტების გათვლით, ბეიბი-ბუმერების პენსიაზე გასვლა გერმანიის შრომის ბაზარს უფრო ძლიერად დაარტყამს, ვიდრე ადრე ვარაუდობდნენ. 2024 წელს მოსალოდნელი იყო, რომ კადრების დეფიციტი 3 მილიონი ადამიანით გაიზრდებოდა.
IW: გერმანიაში შრომისუნარიანი მოსახლეობის რაოდენობა შემცირდება
ბეიბი-ბუმერების თაობას მიაკუთვნებენ 1954-1969 წლებში დაბადებულებს. ეს გერმანიის თითქმის 20 მილიონი მოქალაქეა. მათგან დაახლოებით მეოთხედი უკვე 67 წელს გადაცილებულია, ანუ პენსიაზეა გასული. დანარჩენები ამ ასაკს 2036 წლისთვის მიაღწევენ.
IW-ის გათვლით, შრომის ბაზარზე ახალი კადრების გამოსვლა ამ დანაკარგს ვერ აანაზღაურებს, რადგან მოსახლეობის შემცირება მოსალოდნელზე უფრო ინტენსიურად მიმდინარეობს. შედეგად, გერმანიაში შრომისუნარიანი მოსახლეობის რაოდენობა 7%-ით შემცირდება და 51 მილიონ ადამიანს მიაღწევს.
„უკვე რამდენიმე წელიწადში ეკონომიკას არ ეყოფა სამუშაო ძალა იმისთვის, რომ კეთილდღეობა უზრუნველყოს და სოციალური სახელმწიფო დღევანდელი სახით შეინარჩუნოს“, — ციტირებს AFP IW-ის ექსპერტ ჰოლგერ შეფერს.
მისი თქმით, ვითარების გამოსასწორებლად საჭიროა, მეტი ადამიანი უფრო დიდხანს მუშაობდეს, ხოლო კომპანიებმა საზღვარგარეთიდან კვალიფიციური სპეციალისტების დასაქმების პროცესი უნდა გაამარტივონ.
გერმანიის მოსახლეობაც შემცირდება
შემცირებისკენ შეიცვალა IW-ის პროგნოზი გერმანიის საერთო მოსახლეობის რაოდენობაზეც. 2024 წელს ინსტიტუტი ვარაუდობდა, რომ 2040 წლისთვის გერმანიის მოსახლეობა 85 მილიონი იქნებოდა. ახლა ეს შეფასება 82 მილიონამდეა შემცირებული.
მიზეზი მიგრაციის ტემპის კლებაა. თუ ადრე მოსახლეობის საერთო დაბერებას იმიგრაცია აბალანსებდა, ახლა ქვეყანაში შესამჩნევად ნაკლები ადამიანი ჩადის, ნათქვამია ანგარიშში.