„კიბო ადამიანს ნამდვილად ცვლის“, — უელსის პრინცესა კეტრინი თავის ავადმყოფობასთან ბრძოლის გამოცდილებაზე BBC-ის ახალ დოკუმენტურ ფილმში საუბრობს. ფილმს „Heal“ („განკურნება“) ჰქვია.
„ის სხეულს ცვლის, ფიზიკურად გცვლის, მაგრამ კიბოს დიაგნოზის მიღებას ბევრად უფრო ღრმა გავლენა აქვს — ის შინაგანადაც ძალიან, ძალიან გცვლის“, — ამბობს კეტრინი დოკუმენტური ფილმის პირველ კადრებში. ფილმში ის საკუთარ ავადმყოფობასა და გამოჯანმრთელებაზე ფიქრებს გვიზიარებს.
ამ ძალიან პირად ფილმში კეტრინი კიბოსთან ბრძოლის გამოცდილებაზე საუბრობს და ამბობს: „გამოჯანმრთელება გზაა, რომელიც უნდა გაიარო“.
ფილმში ახალი კადრებიცაა: ამ წლის დასაწყისში კეტრინი „სამი მწვერვალის გამოწვევის“ (Three Peaks Challenge) მარშრუტს გადის. მონაწილეებმა ერთ დღეში ინგლისის, შოტლანდიისა და უელსის უმაღლეს მწვერვალებზე უნდა ასვლა მოასწრონ.
„ცხადია, ცხოვრებისეული სირთულეები მარტო არ უნდა გამოვიაროთ“, — ამბობს კეტრინი კადრს მიღმა. ეკრანზე კი კიბოთი დაავადებული სხვა პაციენტებისა და პრინცესას ოჯახის წევრებთან, მათ შორის მეუღლესთან, პრინც უილიამთან, ჩახუტების კადრები ჩნდება.
„ხშირად სწორედ ტკივილის გავლით ვხვდებით, რომ მის მიღმა რაღაც მშვენიერი იმალება“, — ამბობს ის და კიბოსთან ბრძოლის გამოცდილებით გამოწვეულ ცვლილებებზე ფიქრობს.

კეტრინს არასდროს გაუმხელია, კიბოს რომელი სახეობა ჰქონდა. თუმცა 2024 წლის მარტში განაცხადა, რომ კიბოს დიაგნოზი დაუსვეს და ქიმიოთერაპიას იტარებდა. 2025 წლის იანვარში მან თქვა, რომ რემისიაში იყო, ხოლო მომდევნო თვეებში სამეფო მოვალეობების შესრულებას თანდათან დაუბრუნდა.
კეტრინი ხშირად საუბრობდა იმაზე, თუ როგორ შეეცვალა ავადმყოფობის შემდეგ ცხოვრების აღქმა. ის ასევე აღნიშნავდა, რომ ჯანმრთელობაზე ზრუნვას უფრო ჰოლისტიკური მიდგომა სჭირდება და ის მხოლოდ ფიზიკურ გამოჯანმრთელებაზე არ უნდა შემოიფარგლოს.
პრინცესა მკურნალობის შემდეგ დამდგარ კარგ და ცუდ დღეებზე ჰყვებოდა. მას სურდა გაეფანტა წარმოდგენა, თითქოს პაციენტებს ავადმყოფობამდე არსებულ მდგომარეობაში დაბრუნება მაშინვე შეუძლიათ.
როგორც ჩანს, ეს დოკუმენტური ფილმი მისი გამოჯანმრთელების გზის ყველაზე სრულ და პირად ამბავს მოგვიყვება. პრინცესა საკუთარ ფიქრებზეც ისაუბრებს: რა გავლენა შეიძლება მოახდინოს ასეთმა ავადმყოფობამ ადამიანზე და როგორ იპოვა მან გამოჯანმრთელებისკენ მიმავალი გზა.
მას შემდეგ კეტრინი თავის საქველმოქმედო ორგანიზაციებში მუშაობას დაუბრუნდა. ამ კვირის დასაწყისში კი პრინც უილიამთან ერთად ინდოეთში გაემგზავრა Earthshot Prize-ის დაჯილდოების ცერემონიაზე დასასწრებად. ეს იყო მათი პირველი ერთობლივი ოფიციალური საზღვარგარეთული ვიზიტი პრინცესას კიბოს მკურნალობის შემდეგ.
კეტრინი ლონდონის „როიალ მარსდენის“ საავადმყოფოში მკურნალობდა. დოკუმენტური ფილმის სხვა ქვეყნებში ჩვენებიდან მიღებული თანხა საავადმყოფოს საქველმოქმედო ფონდს გადაერიცხება.
როცა კიბოთი დაავადებული პაციენტები ლონდონის ამ საავადმყოფოში მკურნალობას ამთავრებენ, მათ სიმბოლურად ზარის დარეკვა შეუძლიათ.
„ზარი არ დამირეკავს“, — ეუბნება კეტრინი ძმას, ჯეიმს მიდლტონს.
„იქნებ ეს არის შენი ზარის დარეკვა“, — პასუხობს ის და მთის მარშრუტს და მთლიანად დოკუმენტურ ფილმს გულისხმობს.


