აშშ-ის კონგრესში დემოკრატები SpaceX-ის პროექტების დაფინანსების შეზღუდვით იმუქრებიან, თუ არ გაირკვევა, ვინ და რატომ ზღუდავდა სამხედრო სატელიტური სისტემის Starshield-ის მუშაობას. ამ სისტემას უკრაინელი სამხედროები იყენებენ.
კონგრესმენმა ჯიმ ჰაიმსმა უკვე მოსთხოვა განმარტებები აშშ-ის დაზვერვას და თავად მასკს. ოქტომბერსა და ნოემბერში კავშირის შეზღუდვები ხელს უშლიდა უკრაინის ოპერაციებს, რომლებიც რუსული დრონების გადაჭერას ისახავდა მიზნად. ზოგიერთ პერიოდში მსგავსი მისიების თითქმის ყველა მცდელობა ჩაიშალა.
თუმცა, ჯერჯერობით რთულია იმის გარკვევა, ვინ იყო პასუხისმგებელი. SpaceX-ისა და პენტაგონის წარმომადგენლები კერძო საუბრებში პასუხისმგებლობას თეთრ სახლს აკისრებდნენ. ტრამპი უარყოფს, რომ ამაში მონაწილეობდა, მისი ადმინისტრაცია პასუხისმგებლობას SpaceX-ს აკისრებს, კომპანია კი ნოემბრის შეფერხებებს ტექნიკური პრობლემებით ხსნის.
ჰაიმსი პასუხების მისაღებად აპირებს, კონგრესის კონტროლი გამოიყენოს დაფინანსებაზე. სასწორზე SpaceX-ის სახელმწიფო კონტრაქტებია, რომელთა ღირებულებაც მილიარდობით დოლარს აღწევს.
მასკმა უკრაინაში Starlink-ის შეზღუდვებთან დაკავშირებულ საქმეში თავის დასაცავად ლობისტები დაიქირავა — Fox News
SpaceX-მა Mehlman Consulting-ის ხუთი სპეციალისტი დაიქირავა. ეს კომპანია ბიზნესებს ფასიანი მომსახურების სანაცვლოდ აშშ-ის ხელისუფლებასთან საკუთარი ინტერესების დაცვაში ეხმარება. ამისთვის მისი თანამშრომლები ორივე პარტიის კონგრესმენებსა და ოფიციალურ პირებთან ურთიერთობებს ამყარებენ და ცდილობენ, დაარწმუნონ ისინი, მხარი დაუჭირონ კლიენტებისთვის ხელსაყრელ გადაწყვეტილებებს და გავლენა მოახდინონ კანონპროექტების შინაარსზე.
ეს მას შემდეგ მოხდა, რაც დემოკრატებმა განაცხადეს, რომ აპირებენ შეამოწმონ, ხომ არ მონაწილეობდა SpaceX უკრაინაში სატელიტური კავშირის მორიგ შეზღუდვაში.


