“28 ოჯახი დარჩა სახლის გარეშე, შევუძენთ და გადავცემთ საცხოვრებელ ბინებს” – ბიძინა და ეკატერინა ივანიშვილების სამძიმრის წერილს ავრცელებენ.
“ღრმა მწუხარებას გამოვხატავთ ფონიჭალაში მომხდარი ტრაგედიის გამო, რასაც 6 ადამიანის სიცოცხლე ემსხვერპლა. ვუსამძიმრებთ გარდაცვლილთა ოჯახებსა და სრულიად საქართველოს ამ უდიდეს ტკივილს. მომხდარი უბედური შემთხვევის შედეგად 28 ოჯახი დარჩა საცხოვრებელი სახლის გარეშე, რის გამოც მე და ჩემმა მეუღლემ მივიღეთ გადაწყვეტილება, რომ აღნიშნულ ოჯახებს შევუძენთ და გადავცემთ საცხოვრებელ ბინებს. ეს არის ის მცირედი დახმარება, რაც გვსურს გამოვხატოთ უდიდესი ტრაგედიის შედეგად დაზარალებულთა მიმართ. კიდევ ერთხელ ვუსამძიმრებთ სრულიად საქართველოს.
ბიძინა და ეკატერინა ივანიშვილები”- ნათქვამია სამძიმრის წერილში.
ქვემო ფონიჭალაში გაზის აფეთქების შედეგად სადარბაზო 19 ნოემბრის დილას ჩამოინგრა. აფეთქება კორპუსის მეხუთე სართულზე მოხდა. მომხდარ ტრაგედიას 6 ადამიანი ემსხვერპლა. სამძებრო-სამაშველო ღონისძიება გვიან ღამით დასრულდა. 7 ადგილობრივიდან, რომლებსაც მაშველები ნანგრევებში 13 საათზე მეტ ხანს ეძებდნენ, მხოლოდ 3 წლის თაია ფხალაძე გადარჩა – ის მაშველებმა 8-საათიანი ძებნის შემდეგ უვნებელი იპოვეს ფონიჭალაში მომხდარ ტრაგედიას ემსხვერპლნენ: ხუთი შვილის დედა ნინო ჭელიძე და მისი 7 წლის შვილი ნუცა ფხალაძე, ვერიკო ვანიშვილი და მისი არასრულწლოვანი შვილი არიანა, 54 წლის ლალი შიშმანაშვილი და ჯაბა საყევარაშვილი


