პრორუსმა ჰაკერებმა ჟურნალისტებისა და პოლიტიკოსების წინააღმდეგ ფიშინგის ახალი კამპანია წამოიწყეს. ამის შესახებ შაბათს, 21 ნოემბერს, გაზეთმა Le Monde-მ გაავრცელა ინფორმაცია. მანამდე ამის შესახებ გამომძიებელმა ჟურნალისტმა ქრისტო გროზევმაც დაწერა. თავდასხმის სამიზნე გახდა თავად გროზევის Signal-ის ანგარიში, გერმანელი ჟურნალისტისა და „პანამის დოკუმენტების“ ერთ-ერთი ავტორის, ბასტიან ობერმაიერის (Bastian Obermayer), ანგარიშიც, ასევე „Le Monde“-ის სამი თანამშრომელი და ფრანგი დეპუტატი ერიკ ბოტორელი.
გროზევის თქმით, მის შემთხვევაში Signal-ში ფიშინგური შეტყობინება ერთ-ერთი კონტაქტის სახელით მოვიდა. ეს იყო გერმანელი ჟურნალისტი, რომელთანაც გროზევს რამდენიმე წელი არ უსაუბრია. გროზევის განმარტებით, თავდამსხმელებმა მისი კონტაქტებიდან ისეთი ადამიანი შეარჩიეს, იმდენად შორეული ნაცნობი, რომ სარწმუნოდ გამოჩენილიყო, თითქოს მას Signal-ში ახალი ნომერი ჰქონდა.
„Le Monde“-ის ჟურნალისტებმა უკრაინის ომზე ვიდეოკონფერენციაზე მოსაწვევები მიიღეს
„Le Monde“-ის ჟურნალისტებმა Signal-ში უკრაინის ომზე ვიდეოკონფერენციის მოსაწვევები მიიღეს. შეტყობინებები, სავარაუდოდ, მათთვის ნაცნობი ევროპელი ჟურნალისტისგან იყო გამოგზავნილი. დეპუტატ ბოტორელს კი ნაცნობის გატეხილი Signal-ანგარიშიდან Telegram-ის ჯგუფში გაწევრიანება შესთავაზეს.
„Le Monde“-ის წყაროებმა, რომლებიც ევროპის უსაფრთხოების სამსახურებში მუშაობენ, თავდასხმები ჰაკერულ ჯგუფ UNC5792-ს მიაწერეს. ეს ჯგუფი ასევე ცნობილია სახელებით Frontier Blizzard და Sentry Bear. ქრისტო გროზევმა დაწერა, რომ საქმე ეხებოდა „ჩვენი მეგობრების — Fancy/Cozy/GummyBear-ის — ფიშინგის ახალ კამპანიას“.
მანამდე ტელეკომპანიებმა CNN-მა და NBC News-მა გაავრცელეს ინფორმაცია, რომ ჰაკერებმა შესაძლოა გატეხეს დანაშაულებრივი ინფორმაციის ეროვნული ცენტრი (NCIC) — აშშ-ის გამოძიების ფედერალური ბიუროს (FBI) ცენტრალური მონაცემთა ბაზა. მისი საშუალებით ფედერალური, რეგიონული და ადგილობრივი უწყებები ერთმანეთს უზიარებენ ინფორმაციას დაკავების ორდერების, ნასამართლობისა და ბიოგრაფიული მონაცემების შემოწმების შესახებ.


