Bloomberg-ის მონაცემებით, გასული წლის განმავლობაში უმდიდრესმა რუსებმა, მათ შორის პრეზიდენტ ვლადიმირ პუტინის გარემოცვის წევრებმა, ქვეყნიდან მილიარდობით დოლარი გაიტანეს. ამის მიზეზი რუსეთის ეკონომიკისა და სახელმწიფო ბიუჯეტის მდგომარეობასთან დაკავშირებული მზარდი შეშფოთებაა. აქტივების ჩამორთმევის გახმაურებული შემთხვევების შემდეგ ისინი შიშობენ, რომ სახელმწიფომ შესაძლოა მათი კაპიტალიც ჩამოართვას ან მათ საკუთარი ქონება დაკარგონ, — წერს სააგენტო ექვს შეძლებულ რუსსა და რუსი მილიარდერების განწყობების მცოდნე სხვა პირებზე დაყრდნობით.
მილიარდერებს თანხები საზღვარგარეთ კრიპტოვალუტის, ოქროსა და უძრავი ქონების საშუალებით გააქვთ
Bloomberg-ის ცნობით, გასული წლის განმავლობაში, განსაკუთრებით კი ბოლო თვეებში, რამდენიმე უმდიდრესი რუსის საინვესტიციო პორტფელში გამოიკვეთა ტენდენცია, რომ კაპიტალი კრიპტოვალუტებში, ოქროში, საზღვარგარეთ მდებარე უძრავ ქონებასა და კერძო საინვესტიციო ფონდებში გადააქვთ, განსაკუთრებით სპარსეთის ყურის ქვეყნებში.
ოფიციალურ სტატისტიკაში არმოხვედრილი კაპიტალის გადინების მასშტაბის შეფასება რთულია — მაგალითად, გაუმჭვირვალე კრიპტოვალუტური ტრანზაქციების შემთხვევაში. თუმცა, კონსერვატიული შეფასებით, 2026 წლის დასაწყისიდან რუსეთიდან ოფიციალური სტატისტიკის გვერდის ავლით გატანილი თანხის მოცულობა ათობით მილიარდ დოლარს შეადგენს, — წერს Bloomberg რამდენიმე რუსი მილიარდერის საინვესტიციო გადაწყვეტილებების მცოდნე ორ წყაროზე დაყრდნობით. მათი თქმით, ეს მაჩვენებელი გასულ წელთან შედარებით გაიზარდა.
რუსი მილიარდერებისთვის აქტივების ჩამორთმევა
აქტივების ჩამორთმევის ერთ-ერთი ბოლო გახმაურებული შემთხვევა „რუსაგროს“ ჰოლდინგის დამფუძნებლის, ვადიმ მოშკოვიჩის საქმე იყო, რომელიც რუს მილიარდერთა სიაში 55-ე ადგილს იკავებდა. მაისის დასაწყისში მოსკოვის ხამოვნიკის სასამართლომ დააკმაყოფილა პროკურატურის სარჩელი მოშკოვიჩისა და მისი ნათესავების აქტივების ჩამორთმევის შესახებ.
სახელმწიფოს გადაეცა „რუსაგროს“ საკონტროლო პაკეტი, აგრეთვე მოშკოვიჩისგან ჩხრეკის დროს ამოღებული და მის ანგარიშებზე არსებული თანხები — 10,5 მილიარდ რუბლზე მეტი, 1,8 მილიონი დოლარი, 1,6 მილიონი ევრო და 200 მილიონ იუანზე მეტი.
ოქტომბერში მოსკოვის ტვერის რაიონულმა სასამართლომ სახელმწიფოს სასარგებლოდ „КДВ Групп“-ის მფლობელის, მილიარდერ დენის შტენგელოვის ქონების ჩამორთმევა გადაწყვიტა. კომპანიას ეკუთვნის ბრენდები „Яшкино“ და „Кириешки“. რუსეთის გენერალურმა პროკურატურამ „КДВ Групп“-ის კაპიტალიზაცია 497 მილიარდ რუბლად, წლიური შემოსავალი კი 756 მილიარდ რუბლად შეაფასა. კომპანიის ინფორმაციით, მას რუსეთში 14 ქარხანა ეკუთვნის.
გარდა ამისა, 2025 წელს სახელმწიფოს საკუთრებაში გადავიდა შპს „ДМЕ Холдинг“, რომელიც მოსკოვის დომოდედოვოს აეროპორტის აქტივებს ფლობდა. სასამართლომ დააკმაყოფილა გენერალური პროკურატურის სარჩელი, რომლის თანახმადაც აეროპორტის ძირითადმა მფლობელმა დმიტრი კამენშჩიკმა და „დომოდედოვოს“ სამეთვალყურეო საბჭოს ხელმძღვანელმა ვალერი კოგანმა, რომლებიც სხვა სახელმწიფოების რეზიდენტები იყვნენ, კანონი დაარღვიეს და სტრატეგიული საწარმოს აქტივებს განკარგავდნენ, ხოლო მის მოგებას საზღვარგარეთ გასატანად იყენებდნენ.
რუსეთის გენერალური პროკურატურის ხელმძღვანელ იგორ კრასნოვის განცხადებით, 2024 წელს უწყებამ სხვადასხვა პირებს თითქმის 2,4 ტრილიონი რუბლის ღირებულების კერძო საკუთრება ჩამოართვა. ეს 2025 წლისთვის დაგეგმილი ფედერალური ბიუჯეტის შემოსავლების დაახლოებით 6%-ია.