თელავის სასტუმრო „აგარანის მამულში“ მომხდარ ინციდენტს რუსულ მედიასა და სოციალურ ქსელებში აგრესიული რეაქცია მოჰყვა, სადაც მთავარი ნარატივია, რომ „თავდასხმა რუსული ენის გამო მოხდა“. რუსული სამთავრობო და პროპაგანდისტული მედიასაშუალებები აქცენტს აკეთებენ იმაზე, რომ კონფლიქტის ერთადერთი მიზეზი ტურისტი ქალების მიერ რუსულად საუბარი გახდა. ისინი მომხდარს „რუსოფობიის“ მორიგ გამოვლინებად აფასებენ და ცდილობენ ქორწილის სტუმრები მაქსიმალურად აგრესიულად წარმოაჩინონ. მიუხედავად იმისა, რომ მოგვიანებით გავრცელდა ვერსია რუსების მიერ შეურაცხყოფასა და წყლის გადასხმაზე, რუსული მედია ამ დეტალს მეორეხარისხოვნად მიიჩნევს.
ინფორმაციამ რუსულ საინფორმაციო სივრცეში ვირუსულად იფეთქა. „საქართველოში დასასვენებლად აღარ ჩავალთ“ – კომენტარების აბსოლუტური უმრავლესობა სწორედ ამ შინაარსისაა. მომხმარებლები მოუწოდებენ ერთმანეთს, დატოვონ საქართველო, გააუქმონ სასტუმროების ჯავშნები და თავიანთი ფული სხვა ქვეყნებში (მაგალითად, თურქეთში, არაბეთის გაერთიანებულ საამიროებში ან თავად რუსეთის კურორტებზე) დახარჯონ. მათი თქმით, „ქართული სტუმართმოყვარეობა მითია“ და იქ ჩასვლა უსაფრთხო აღარ არის.
ასევე, სოციალურ ქსელებში პოპულარულია ნარატივი, რომ საქართველოს ეკონომიკა მთლიანად რუს ტურისტებზეა დამოკიდებული. მომხმარებლები წერენ: „ჩვენი ფულით მდიდრდებიან და ჩვენვე გვცემენ, საერთოდ უნდა ჩავუკეტოთ საზღვრები და აიკრძალოს ფრენები, ნახონ მერე რა დაემართებათ“.
რუსები ასევე მასობრივად წერენ ნეგატიურ რეცენზიებს სასტუმრო „აგარანის მამულზე“ და პოტენციურ კლიენტებს აფრთხილებენ, რომ ამ სასტუმროში „უსაფრთხოების გარანტია არ არსებობს“.
პრორუსული პოლიტიკური გაერთიანება „სოლიდარობა მშვიდობისთვის“ საერთაშორისო მდივანი და ლიდერი მამუკა ფიფია, რომელიც ცნობილია კრემლის პოლიტიკის ღია მხარდაჭერით და მოსკოვთან პირდაპირი კავშირებით, სოციალურ ქსელში აქვეყნებს თელავში, გახმაურებულ ქორწილში მომხდარი ინციდენტის მონაწილე რუსეთის მოქალაქე ქალის ალიონა ნესტერიუკის კომენტარს.
„არ ვთვლი, რომ რამე ფორმით პროვოცირება მოვაწყვეთ, არ გაგვიკეთებია ის რაღაცები, რასაც ინტერნეტში წერენ – ანუ იქ არაფერი შეგვისხამს, ვედრო არ გადაგვიღვრია და ა.შ. ჩამოვედით დაქალის დაბადების დღის აღსანიშნავად, ხუთი გოგო ვიყავით. მხოლოდ გოგოები, კაცები არ იყვნენ. ამასთან, სხვა ადამიანებიც აღნიშნავდა დღესასწაულს, ქორწილი ჰქონდათ. მთელი პატივისცემით, ჩვენც მეგობრის დაბადების დღეს აღვნიშნავდით, შესაბამისად, დაახლოებით 8:15 საათიდან შევედით სასტუმროს ნომერში და იმ წუთიდან, რაც შევედით, აღნიშვნა დავიწყეთ. შამპანური გვქონდა, ბოთლი გავხსენით. შესაბამისად, შესაძლოა წვეთები მოხვდათ, როგორც ისინი ამბობენ, როგორც მეორე მხარე ამბობს, თუმცა თუ შეხედავთ… ნუ, ეგ პრინციპში არარეალურია, იქ გადახურვაც არის, ბალკონიც, არსად გავსულვართ. ანუ მხოლოდ ფანჯრიდან ვიყურებოდით და ამიტომ, შესაძლოა, ორ მხარეს შორის რაღაც გაუგებრობა მოხდა.
მეორე მხარემ დაიწყო ჩხუბი პირველ რიგში, ეს ყველგან ჩანს, ვიდეოშიც. ჩვენს გოგოებს საერთოდ არ გამოუხატავთ აგრესია, არ მიუყენებიათ შეურაცხყოფა – არც ერთ შემთხვევაში, არც ერთი ქვეყნისთვის, არც ერთი ადამიანისთვის, პირადზე არასდროს გადასულან, 100%-ით გეუბნებით.
მე საერთოდ ოთახში ვიყავი. ინციდენტი რომ მოხდა, უბრალოდ გოგოების დასაცავად წამოვდექი, რადგან ის ოთახში შემოიჭრა. მათ კარები გააღეს, რადგან მენეჯერი ეეგონათ, რადგან მენეჯერი მანამდეც შემოვიდა ჩვენთან ერთხელ. ვთხოვეთ, კონფლიქტი მოეგვარებინა – სხვათა შორის, ის ჩვენთან ოთახში დაცვის თანამშრომელთან ერთად იმყოფებოდა. ვთხოვდით, რადგან ეს სიტუაცია ჩვენთვისაც მიუღებელი იყო, ჩვენც სტუმრები ვართ, ჩვენც მთელი პატივისცემით ჩამოვედით ამ ქვეყანაში, არც პირველად ვართ და ვიცით, როგორ მოვიქცეთ აქ. გვეუბნებოდნენ, ფანჯრიდან ნუ იყურებით, უკან შედითო, თუმცა ჩვენც სტუმრები ვიყავით. სასტუმროს ბოდიშიც არ მოუხდია“ – ამბობს „დაზარალებული“.
ინცინდენტი თელავის სასტუმრო „აგარანის მამულში“ 18ივლისს მოხდა. ქორწილის მიმდინარეობისას სასტუმროში დამსვენებელმა უცხო ქვეყნის მოქალაქეებმა სასტუმროს ნომრის აივნიდან შეურაცხყოფა მიაყენეს ქორწილში მყოფ პირებს და წყალი დაასხეს აპარატურას, რომელიც ქორწილის სტუმრების თქმით დაზიანდა. ამის შემდეგ სიძის ძმამ, გიორგი ჭიღლაძემ ფიზიკური დაზიანება მიაყენა უცხო ქვეყნის მოქალაქე ქალს. დაშავებული, შესაბამისი სამედიცინო დახმარების გაწევის მიზნით, კლინიკაში გადაიყვანეს. გიორგი ჭიღლაძე დააკავეს. ქალი, რომელიც დაზარალებულადაა ცნობილი, ამბობს, რომ გიორგი ჭიღლაძე მას უმიზეზოდ შეუვარდა ნომერში და ცხვირი გაუტეხა.
თელავში, სასტუმრო „Agarani Estate“-ში ქორწილის მიმდინარეობის დროს მომხდარი ინციდენტის საქმეზე დაკავებულ გიორგი ჭიღლაძეს ბრალი ოფიციალურად წარუდგინეს.
მას ბრალდების დადგენილება საგამოძიებო უწყებამ გურჯაანის დროებითი მოთავსების იზოლატორში გააცნო.
ჭიღლაძეს სისხლის სამართლის კოდექსის 120-ე მუხლის პირველი ნაწილით წარედგინა ბრალი, რაც ჯანმრთელობის განზრახ მსუბუქ დაზიანებას გულისხმობს.
ცოტახნის წინ გახდა ცნობილი, რომ პროკურატურა ჭიღლაძისთვის აღკვეთის ღონისძიების სახით სასამართლო სხდომაზე 5 000 – ლარიანი გირაოს შეფარდების შუამდგომლობას დააყენებს.
თელავის რაიონული სასამართლო ჭიღლაძის აღკვეთ ღონისძიებაზე სავარაუდოდ 21 ივლისს იმსჯელებს.
გამოძიება მის წინააღმდეგ სისხლის სამართლის კოდექსის 120-ე მუხლით დაიწყო, რაც ჯანმრთელობის განზრახ მსუბუქი დაზიანებას გულისხმობს. აღნიშნული ქმედება 3-წლამდე ვადით თავისუფლების აღკვეთას ითვალისწინებს.
ამასთან, ადმინისტრაციული წარმოება არის დაწყებული მომღერალ ალექსანდრე მრელაშვილთან მიმართებითაც.
შსს-ს ცნობით, მრელაშვილი პოლიციის განყოფილებაში ქორწილში მომხდარ ინციდენტთან დაკავშირებით მოწმის სახით იკითხებოდა, რა დროსაც მან უარი განაცხადა განყოფილებაში დიდი ხნით დარჩენაზე, ამის შემდეგ მან სიტყვიერი შეურაცხყოფა მიაყენა პოლიციის თანამშრომლებს და ნივთების შესანახი კარადა დააზიანა.