რუსეთს წინააღმდეგ ევროკავშირის მხრიდან სანქციების 21-ე პაკეტის მიღების შემდეგ რუსულმა საგადასახადო და ფინანსური სერვისების სისტემა Zolotaya Korona-მ საქართველოში ფულადი გადარიცხვები შეაჩერა.
„Код Дурова” აღნიშნავს, რომ საქართველო გადარიცხვების სისტემისთვის ერთ-ერთი მთავარი მიმართულება იყო. გამოცემის თანახმად, გადარიცხვები რიგ სხვა ქვეყნებშიც შეწყდა, თუმცა კონკრეტულად რომელ ქვეყნებზეა საუბარი, ცნობილი არ არის.
Zolotaya Korona-ს გუნდმა რუსულ გამოცემა RBC-ს განუცხადა, რომ „ამჟამად გარკვეული სატრანსფერო მიმართულებები ხელმისაწვდომი არ არის”. გარდა ამისა, „Freedom Bank Kazakhstan”-ის კლიენტებმა შეტყობინება მიიღეს, რომ დროებით შეჩერებულია გადარიცხვები „Цифра банк”-ის მეშვეობით. რუსული ტელეარხი „Дождь” (TV Rain) წერს, რომ სერვისის მომხმარებლები აცხადებენ — საქართველოში ფულის გადარიცხვას ვეღარ ახერხებენ.
ცვლილებები დაკავშირებულია ევროკავშირის მიერ რუსეთის წინააღმდეგ სანქციების 21-ე პაკეტის მიღებასთან, რომელიც ევროკავშირმა 23 ივლისს, თითქმის ორკვირიანი მოლაპარაკებების შემდეგ დაამტკიცა. ეს არის ბოლო ოთხი წლის განმავლობაში ევროკავშირის მიერ მიღებული ყველაზე მასშტაბური სანქციების პაკეტი — მასში ჯამში 218 პირი და ორგანიზაცია შედის. შეზღუდვების სიაში, სხვა ორგანიზაციებთან ერთად, მოხვდა Zolotaya Korona-ს ოპერატორი, ნოვოსიბირსკის „Платежный центр” და „Цифра банк”. ევროკავშირმა ასევე 32 რუსულ ბანკს, კრიპტოკომპანიებსა და ნავთობით ვაჭრობის პლატფორმებს ტრანზაქციები აუკრძალა.
მას შემდეგ, რაც რუსეთიდან ომის გამო საერთაშორისო საგადახდო სისტემები Visa და MasterCard გავიდა, Zolotaya Korona რუსეთიდან სხვა ქვეყნებში ფულის გადარიცხვის ერთ-ერთი მთავარი არხი გახდა.