თბილისის საქალაქო სასამართლომ აფხაზი ბლოგერის, დაურ ბუავას განსაცდელში მიტოვების ფაქტზე დაკავებულ უკრაინის მოქალაქე ვალერია კირლიუკს აღკვეთის ღონისძიების სახით პატიმრობა შეუფარდა. გადაწყვეტილება მოსამართლე არსენ კალატოზიშვილმა მიიღო.
პროკურატურა პატიმრობას ბუავას მეგობარი ქალის მხრიდან ახალი დანაშაულის ჩადენის, მოწმეებზე ზემოქმედებისა და მიმალვის საფრთხეებით ითხოვდა. დაცვის მხარე კი აცხადებდა, რომ დანაშაული მსუბუქი კატეგორიისაა და დაკავებულისთვის აღკვეთის ღონისძიების გამოყენება საჭირო არ იყო. თავად კირლიუკი დუმილის უფლებას იყენებს.
დაურ ბუავა თბილისში, საკუთარ საცხოვრებელ ბინაში, 28 აგვისტოს გარდაცვლილი იპოვეს. გამოძიების ინფორმაციით, მან და კირლიუკმა ნარკოტიკული საშუალება მოიხმარეს, რის შემდეგაც ორივე შეუძლოდ გახდა. გამოძიების ვერსიით, კირლიუკმა მძიმე მდგომარეობაში მყოფი ბუავა მიატოვა, ბინის კარი გარედან ჩაკეტა და შემთხვევის ადგილიდან წავიდა.
საქმეზე გამოძიება ასევე მიმდინარეობს თვითმკვლელობამდე მიყვანის მუხლით. ბუავას გარდაცვალების საქმეზე ნარკოტიკული საშუალების შეძენა-შენახვის ბრალდებით კიდევ ორი პირია დაკავებული.