დიდი ბრიტანეთი, ევროკავშირის კვალდაკვალ, რუსი ბიზნესმენების — ალიშერ უსმანოვისა და მიხაილ ფრიდმანის წინააღმდეგ სანქციებს არ გააუქმებს. ამის შესახებ უკრაინის პრეზიდენტ ვოლოდიმირ ზელენსკის ნიუ-იორკში, გაეროს გენერალური ასამბლეის ფარგლებში, ოთხშაბათს, 23 სექტემბერს გამართულ დახურულ შეხვედრაზე გაერთიანებული სამეფოს პრემიერ-მინისტრმა ენდი ბერნემმა განუცხადა, — იუწყება Bloomberg განხილვის დეტალების მცოდნე წყაროებზე დაყრდნობით. სააგენტოს ცნობით, ბერნემმა ასევე გამოთქვა უთანხმოება ევროკავშირის გადაწყვეტილებასთან დაკავშირებით, უსმანოვი და ფრიდმანი სანქციების სიიდან ამოეღო.
ევროკავშირის საბჭომ 22 სექტემბერს ორივე ბიზნესმენი სანქციების სიიდან ამოიღო. ამავე დროს, დაახლოებით 3 000 სხვა ფიზიკური და იურიდიული პირის წინააღმდეგ შეზღუდვები ერთბაშად სამი წლით — 2029 წლის 22 სექტემბრამდე — გახანგრძლივდა. მანამდე სანქციების რეჟიმის განახლება ყოველ ექვს თვეში იყო საჭირო.
როგორ ამოიღო ევროკავშირმა უსმანოვი და ფრიდმანი სანქციების სიიდან
უსმანოვისთვის სანქციების მოხსნას საფრანგეთი და სლოვაკეთი მოითხოვდნენ. როგორც Reuters-ი ადრე იუწყებოდა, პარიზი თავის პოზიციას ეროვნული უსაფრთხოების მოსაზრებებით ხსნიდა. Reuters-ის წყაროები ამას საფრანგეთსა და აზერბაიჯანს შორის საფრანგეთის მოქალაქეების გათავისუფლებაზე მიმდინარე მოლაპარაკებებს უკავშირებდნენ.
ფრიდმანის სანქციების სიიდან ამოღებას ლუქსემბურგი ითხოვდა. მანამდე რუსმა ბიზნესმენმა ამ ქვეყნის წინააღმდეგ 16 მილიარდი დოლარის ოდენობის საარბიტრაჟო სარჩელი შეიტანა.
სლოვაკეთიც მხარს უჭერდა ფრიდმანისთვის შეზღუდვების მოხსნას, მაშინ როცა ლატვია ბოლო მომენტამდე ეწინააღმდეგებოდა ორივე ბიზნესმენის სანქციების სიიდან ამოღებას.
ბრიტანეთის სანქციები ძალაში რჩება
დიდმა ბრიტანეთმა ალიშერ უსმანოვს სანქციები 2022 წლის მარტში დაუწესა. მისი აქტივები გაიყინა, ხოლო ქვეყანაში შესვლა აეკრძალა. ბრიტანეთის ხელისუფლებამ შეზღუდვები უსმანოვის ვლადიმირ პუტინთან კავშირებსა და რუსეთის სახელმწიფოსთვის სტრატეგიულად მნიშვნელოვან სექტორებში მის საქმიანობას დაუკავშირა.
ფრიდმანიც ბრიტანეთის სანქციების ქვეშ 2022 წლის მარტში მოხვდა. ხელისუფლება დასაბუთებად მის კავშირებს „ალფა-გრუპთან“, ალფა-ბანკთან და ფინანსური სექტორის სხვა კომპანიებთან ასახელებდა. ორივე ბიზნესმენი კვლავ რჩება ბრიტანეთის სანქციების სიაში.
The Insider წერდა, რომ შეზღუდვების დაწესების შემდეგ ფრიდმანი საბანკო ბარათების დაბლოკვასა და ყოველდღიური ხარჯების დასაფარად ხელისუფლების ნებართვის მიღების აუცილებლობაზე ჩიოდა. უსმანოვი სანქციების გასაჩივრებას ევროპულ სასამართლოებში ცდილობდა, თუმცა 2024 წელს ევროკავშირის საერთო სასამართლომ მისი სარჩელი არ დააკმაყოფილა.