საქართველოს რკინიგზამ უკრაინის მიერ სანქცირებულ რუსულ კომპანია „როსლავლსკისთან“ 9.6 მილიონ დოლარად 200 ვაგონის შესყიდვის ხელშეკრულება გააფორმა. საწარმოს გენერალური დირექტორი ვლადიმერ პუტინის პარტიის წევრი და კრემლის ორდენოსანია. საქართველოს რკინიგზის ხელმძღვანელობა გარიგებას დაბალი ფასით და ევროპული ალტერნატივის არარსებობით ამართლებს.
„9,6 მილიონ დოლარად რუსული კომპანია “როსლავლსკისგან” 200 ცალ ნახევარვაგონს ვყიდულობთ. თითო ვაგონში 48 000 დოლარს ვიხდით.
2026 წლის 27 აგვისტოს საქართველოს რკინიგზამ ხელშეკრულება გააფორმა კომპანიასთან, რომლის გენერალური დირექტორი იური ჩერნიაკი გახლავთ.
იური ჩერნიაკი პუტინის პარტიის, “ერთიანი რუსეთის” წევრი და ამავდროულად, სმოლენსკის ოლქის რეგიონალური დუმის დეპუტატია.
ცოტა ხნის წინ, მას რუსეთის პრეზიდენტის, ვლადიმერ პუტინის ბრძანებულებით ალექსანდრე ნეველის ორდენი მიენიჭა.
შეგახსენებთ, რომ სუსმა 2026 წლის 16 აპრილს, საქართველოს რკინიგზის ყოფილ დირექტორზე, დავით ფერაძესა და კიდევ რვა პირზე კორუფციის ბრალდებით საქმე აღძრა.
როგორც ცნობილია, ამ პოზიციაზე მხოლოდ და მხოლოდ ბიძინა ივანიშვილის ნდობით აღჭურვილი კადრები ინიშნებიან.
მანამდე რკინიგზის ხელმძღვანელის პოსტს მამუკა ბახტაძე იკავებდა, რომელიც შემდეგ ბ. ივანიშვილმა პრემიერ-მინისტრად დააწინაურა.
კორუფციაში მხილებული ფერაძე, ბიძინა ივანიშვილის დაფუძნებულ „თანაინვესტირების ფონდში“ მუშაობდა – მტკვარი ჰესის დირექტორი იყო.
ფერაძის ძმაკაცი და ბიზნეს-პარტნიორი გახლავთ, ირაკლი კობახიძის მიერ რუსეთში საქართველოს „ელჩად“ დანიშნული კაცი – მამუკა მერკვილაძე.
ვიდრე მამუკა მერკვილაძეს ელჩად გადაიყვანდნენ, ის 2018 წელს ფერაძემ რკინიგზის შვილობილი კომპანიის „GR Logistics & Terminals“-ის დირექტორად დანიშნა.
მამუკა მერკვილაძემ 800-მდე ვაგონი რუსულ კომპანიას აუქციონის გარეშე, ქვეყნისთვის დამაზიანებელი პირობებით გადასცა და ამ ფაქტიდან მალევე თანამდებობა დატოვა.“ – ამის შესახებ სამოქალაქო აქტივისტი სალომე სიმონია სოციალურ ქსელში წერს და ხელშეკრულების ფოტოსაც აქვეყნებს.
რუსული კომპანიის, სს „როსლავლსკის ვაგონშემკეთებელი ქარხნის“ (АО «Рославльский ВРЗ») გენერალური დირექტორი იური ალექსანდრეს ძე ჩერნიაკი არ არის უბრალოდ ბიზნესმენი, არამედ კრემლის პოლიტიკური სისტემის აქტიური ნაწილია:
ჩერნიაკი წლებია პუტინის მმართველი პარტიის, „ედინაია როსიას“ (Единая Россия) ადგილობრივი ლიდერი და გამოკვეთილი ფიგურაა; არის სმოლენსკის საოლქო დუმის რამდენიმე მოწვევის დეპუტატი სწორედ პუტინის პარტიიდან; ასევე პუტინის პირადი განკარგულებითა და ბრძანებულებით, იური ჩერნიაკი დაჯილდოებულია რუსეთის უმაღლესი სახელმწიფო ორდენებით, მათ შორის ალექსანდრე ნევსკის ორდენით, ღირსების ორდენითა და მედლით „სამშობლოს წინაშე დამსახურებისთვის“. რუსეთში მსგავსი სახელმწიფო ჯილდოები სტრატეგიული საწარმოების ხელმძღვანელებს მხოლოდ კრემლის პოლიტიკის სრული მხარდაჭერისა და ერთგულებისთვის გადაეცემათ.
თავად კომპანია კი უკრაინის მიერაა სანქცირებული, რადგან ის უკრაინისთვის რუსული სამხედრო მანქანის ლოგისტიკური ზურგია.
უკრაინის ეროვნული უსაფრთხოებისა და თავდაცვის საბჭოს (NSDC) და კორუფციის პრევენციის ეროვნული სააგენტოს (NACP) ოფიციალური დასაბუთებით, სს „როსლავლსკის ვაგონშემკეთებელი ქარხანა“ სანქციების სიაში შეყვანილია რუსეთის სამხედრო აგრესიის მატერიალურ-ტექნიკური და ფინანსური მხარდაჭერის გამო.
რუსული კომპანიის შერჩევას საქართველოს რკინიგზის გენერალური დირექტორი ლაშა აბაშიძე დაბალი ფასითა და ბაზარზე არსებული არჩევანით ხსნის, ასევე იმით, რომ მისი თქმით, ევროპული კომპანიები საქართველოს რკინიგზისთვის შესაბამის ვაგონებს არ ამზადებენ. უკრაინის მიერ დაწესებულ სანქციებზე კი ამბობს, რომ ინფორმაცია არ აქვს.
„ეგ კომპანია აწარმოებს ყველაზე საუკეთესო ვაგონებს. ჩვენ მაგ კომპანიასთან გავაფორმეთ ხელშეკრულება ძალიან დაბალ ფასად, ყველაზე დაბალი ფასი წარმოგვიდგინა. რკინიგზაში ჩვენ ევროპიდან სატვირთო ვაგონებს ვერ ვიყიდით, იმიტომ, რომ არ აწარმოებს ევროპული ქვეყნები ჩვენს სატვირთო ვაგონებს. არანაირად არ არის სანქცირებული, უკრაინის მხრიდან არ ვიცი, არის თუ არა, ვაგონები როცა შემოდის და ჩვენს საკუთრებაში გადმოდის, მას შემდეგ ხდება ანგარიშსწორება, ძალიან მალე შემოვა“- განაცხადა აბაშიძემ.
„კოალიცია ცვლილებისთვის“ წევრი და კორუფციის მკვლევარი ბესიკ დონაძე კი ამბობს, რომ „საქართველოს რკინიგზამ ყოველგვარი საშუამავლო კომპანიის გარეშე ანუ საქართველოში რეგისტრირებული რომელიმე კომპანიის გარეშე, პირდაპირ რუსულ ქარხანაში, რუსული ბანკის გავლით გადარიცხა თანხა, ანუ აქედან დოლარი გადაირიცხა და იქ კონვერტაციით რუბლები ჩაირიცხა, მაშინ, როდესაც დღეს მსგავსი ვაგონების შეძენა შესაძლებელი იყო სხვა ქვეყნებში.“