დამთხვევა თუ გამიზნული ქმედება: რატომ დაიწყო საქართველოში სისხლისსამართლებრივი დევნა იმ ქართველი მოხალისეების მიმართ, რომლებზეც რუსული საოკუპაციო ჯარების წინააღმდეგ ბრძოლის გამო რუსეთის პროკურატურამ აღძრა საქმეები.
ამ კონტექსტში „საერთაშორისო გამჭვირვალობა-საქართველომ“ გია ბარამიძის, ალეკო ელისაშვილის, ირაკლი ოქრუაშვილის, დავით ქაცარავას, მამუკა მამულაშვილისა და უკრაინაში მებრძოლი სხვა ქართველი მოხალისეების მიმართ განხორციელებული მოქმედებები შეისწავლა.
„ასეთი თანხვედრა ავტომატურად არ ადასტურებს საქართველოსა და რუსეთის უწყებებს შორის კოორდინაციას ან შეთანხმებულ მოქმედებას. თუმცა, როდესაც საჯარო დისკრედიტაციას მოსდევს სისხლისსამართლებრივი დევნა, პატიმრობა ან სხვა მკაცრი ღონისძიებები, ჩნდება საფუძვლიანი ეჭვი, რომ ივანიშვილის ხელისუფლება ამგვარი მოქმედებებით რუსეთის ხელისუფლების გულის მოგებას ცდილობს.
ბლოგში განხილული საქმეები მნიშვნელოვანია შეფასდეს ფართო პოლიტიკურ კონტექსტში, რომელსაც ბოლო პერიოდში საქართველოს ხელისუფლების მიერ დასავლეთისგან დაშორებისა და რუსეთთან დაახლოებისკენ მიმართული პოლიტიკა განსაზღვრავს.
ამ კონტექსტში იკვეთება მოვლენათა საყურადღებო თანმიმდევრობა: რუსეთის ხელისუფლების მიერ კონკრეტული პირების მიმართ სისხლისსამართლებრივი დევნის დაწყებას მოსდევს იმავე პირების წინააღმდეგ დევნა საქართველოში, საჯარო დისკრედიტაციის კამპანიის თანხლებით. განხილულ საქმეებში შეინიშნება სამართლებრივი კვალიფიკაციის სისწორის, ბრალდებების დასაბუთებულობისა და გამოყენებული ღონისძიებების პროპორციულობის პრობლემები.
ბლოგში განხილული ინდივიდუალური საქმები ერთმანეთისგან დამოუკიდებლად რომ განვიხილოთ, შესაძლოა, შემთხვევითობის შთაბეჭდილებას ტოვებდეს. ერთად წაკითხვისას კი ისინი საქართველოს ხელისუფლების მიერ თანმიმდევრულად გატარებულ პოლიტიკაზე შესაძლოა მიუთითებდეს, რომლის სამიზნეც 2022 წელს, რუსეთის უკრაინაში შეჭრის შემდეგ, უკრაინის მხარეს, რუსეთის წინააღმდეგ მებრძოლი საქართველოს მოქალაქეები არიან. შესაბამისად, ამ პირებს რუსეთის ფედერაციასა და საქართველოში პარალელური დევნა და მსჯავრდება აერთიანებთ.
როდესაც ერთი და იმავე ადამიანების წინააღმდეგ პარალელურად მოქმედებენ როგორც რუსეთის, ისე საქართველოს სამართალდამცავი და მართლმსაჯულების სისტემები, ბუნებრივია, ეს სერიოზულ კითხვებს აჩენს საქართველოს ხელისუფლების მიერ გატარებული პოლიტიკის ეროვნულ ინტერესებთან შესაბამისობის კუთხით“- ნათქვამია „საერთაშორისო გამჭვირვალობა-საქართველოს“ კვლევაში