თბილისში ირანელი აქტივისტი მოჰამმად მაჰდი რაჰიმიანი დააკავეს და და მიგრაციის დეპარტამენტის დროებითი განთავსების ცენტრში გადაიყვანეს.
ინფორმაციას ,,უფლებები საქართველო” ავრცელებს, რომელიც დაკავებულისა და მისი ოჯახის ინტერესებს იცავს მას შემდეგ, რაც ორგანიზაციას მოჰამმად მაჰდი რაჰიმიანის ოჯახთან დაკავშირებულმა პირმა სამართლებრივი დახმარების მიღების თხოვნით მიმართა.
,,უფლებები საქართველოს” იურისტები მიგრაციის დეპარტამენტის დროებითი განთავსების ცენტრში უკვე შეხვდნენ ირანელ აქტივისტს და დაცვის პოზიცია შეუთანხმეს.
უფლებადამცველი ორგანიზაციის ცნობით, რაჰიმიანი მიგრაციის დეპარტამენტის წარმომადგენლებმა 2026 წლის 12 ოქტომბერს დააკავეს. მას და მის ოჯახს უარი ეთქვათ საქართველოში თავშესაფრის მიღებაზე და შესაბამისად, აღარ აქვთ ქვეყანაში კანონიერად ყოფნის უფლება.
დღეს მიგრაციის დეპარტამენტის მიერ გასაუბრებაზე დაბარებული იყო რაჰიმიანის მეუღლეც, თუმცა გასაუბრება ხუთშაბათისთვის გადაიდო. რაჰიმიანს და მის მეუღლეს ჰყავთ ორი არასრულწლოვანი შვილი, რომლებიც ქართულ სკოლაში სწავლობენ.
„რაჰიმიანის სიცოცხლესა და ჯანმრთელობას ირანში გაძევების შემთხვევაში შეექმნება რეალური და მყისიერი საფრთხე. ,,უფლებები საქართველო” ყველა სამართლებრივ ზომას მიმართავს მოჰამმად მაჰდი რაჰიმიანისა და მისი ოჯახის ინტერესების დასაცავად და მოუწოდეს სახელმწიფო ორგანოებს, იმოქმედონ არგაძევების პრინციპიდან გამომდინარე, საქართველოს კანონმდებლობისა და საერთაშორისო სტანდარტების შესაბამისად“ – ნათქვამია ორგანიზაციის განცხადებაში.
მოჰამად მაჰდი რაჰიმიანი ირანელი პოლიტიკური აქტივისტია, რომელიც ირანის ისლამური რესპუბლიკის მმართველ რეჟიმს ღიად უპირისპირდება.
რაჰიმიანი საქართველოში 2022 წლის აპრილში შემოვიდა და იმავე წლის დეკემბერში საერთაშორისო თავშესაფარი მოითხოვა.
შსს-ს მიგრაციის დეპარტამენტმა მას ლეგალური საფუძვლების არარსებობის გამო თავშესაფარზე უარი უთხრა. აქტივისტმა ეს გადაწყვეტილება სასამართლოში გაასაჩივრა, თუმცა თბილისის საქალაქო და სააპელაციო სასამართლოებმა უწყების პოზიცია ძალაში დატოვეს. მისი თავშესაფრის მაძიებლის სტატუსი 2026 წლის 26 ივნისს საბოლოოდ შეწყდა. ქვეყანაში ლეგალური საფუძვლის გარეშე დარჩენის გამო, მიგრაციის დეპარტამენტმა იგი 12 ოქტომბერს თბილისში დააკავა და მიგრანტთა დროებითი განთავსების ცენტრში გადაიყვანა.