უკრაინის პრეზიდენტის, ვოლოდიმირ ზელენსკის თქმით, პოლონეთმა უკრაინას რუსეთის თავდასხმებისგან თავდაცვის მიზნით დახმარების პაკეტი გადასცა, რომელიც შეიცავს ისეთ ელემენტებს, რომლებსაც არ ასაჯაროებენ.ამის შესახებ ზელენსკიმ პოლონეთის პრემიერმინისტრ დონალდ ტუსკთან შეხვედრის დასაწყისში განაცხადა.
ტუსკმა უკრაინის პრეზიდენტს უთხრა, რომ უკრაინას პოლონეთის მხარდაჭერის იმედი უნდა ჰქონდეს.
“მინდა დაგარწმუნოთ უკრაინა, თქვენი ხალხი და პირადად თქვენ, რომ მარტო არ ხართ. შეგიძლიათ, ჩემი, პოლონეთისა და ევროკავშირის იმედი გქონდეთ. ბრიუსელში ყველა ლიდერთან გამართული მოლაპარაკებების შემდეგ სრულიად ნათელია, რომ ყველაფერი, რაც პუტინსა და რუსეთს ამ ომში დაეხმარებოდა, ევროპისა და პოლონეთისთვის მიუღებელია.” – განაცხადა ტუსკმა.
დონალდ ტუსკი სოციალურ ქსელში წერს, რომ პოლონეთი და უკრაინა არა მხოლოდ მეზობელი ქვეყნები არიან, არამედ მეგობრებიც, რომლებსაც ერთმანეთის იმედი რთულ დროსაც შეუძლიათ ჰქონდეს.
“ჩვენ მხოლოდ მეზობლები არ ვართ. ჩვენ მეგობრები ვართ, რომლებსაც რთულ დროს შეუძლიათ ერთმანეთის იმედი ჰქონდეთ და ამას ვერავინ ვერასდროს შეცვლის”, – აცხადებს დონალდ ტუსკი.
თავის მხრივ, ზელენსკიმ პოლონეთს მხარდაჭერისთვის მადლობა გადაუხადა როგორც პოლიტიკურ და გეოპოლიტიკურ საკითხებში, ისე სხვა მიმართულებებით.
“ის, რაც თქვენ გააკეთეთ… კარგი, ზოგჯერ ეს მხოლოდ ჩვენ ორს შორის უნდა დარჩეს.” — თქვა ზელენსკიმ პოლონეთის პრემიერის ჟესტიკულაციაზე რეაგირებისას.
“მაგრამ ჩვენ მადლიერები ვართ, რადგან ძალიან რთულია ჩვენი ქვეყნისა და დედაქალაქის მასირებული თავდასხმებისგან დაცვა. მადლიერები ვართ ამისთვის, ასევე 20-მილიმეტრიანი საბრძოლო მასალისთვის, რომელიც საჰაერო თავდაცვისთვის გამოიყენება, და სხვა დახმარებისთვის. სწორედ ამას ვთხოვთ ახლა სხვადასხვა ქვეყანას და მთელ ევროპას.” – აღნიშნა ზელენსკიმ.