“ნაფტალინმოყრილ კითხვებს ნუ მისვამთ, ჩემი ყველა ბრძანება არის ეფექტური ” – ასე უპასუხა ეროვნული ბანკის პრეზიდენტმა, ნათია თურნავამ ჟურნალისტს კითხვაზე: „ნანობთ თუ არა, რომ წლების წინ ოთარ ფარცხალაძის დასაცავად მოქმედებდით“.
„ნაფტალინმოყრილ კითხვებს ნუ მისვამთ. ჩემი ყველა ბრძანება არის ეფექტური და სწორი… ჩემი ბრძანებები არასდროს ყოფილა ვინმე კონკრეტულთან დაკავშირებული“, – განაცხადა ნათია თურნავამ „ტვ პირველის“ ჟურნალისტს.
ეროვნულმა ბანკმა 2023 წლის სექტემბერში ყოფილი მთავარი პროკურორის, ოთარ ფარცხალაძის აშშ-ს მიერ დასანქცირების შემდეგ საერთაშორისო სანქციების აღსრულების წესი შეცვალა. საუბარია ბრძანებაზე, რომლის თანახმადაც საერთაშორისო სანქციები საქართველოს მოქალაქეებზე ვრცელდება მხოლოდ მაშინ როდესაც ანალოგიურის შესახებ საქართველოს სასამართლოს განაჩენი შევა ძალაში.