მერცის წერილში ნათქვამია, რომ ყველა წევრი ქვეყნის მიერ უკრაინის დახმარების მზადყოფნის დადასტურება „აუცილებელი პირობაა ამ პრობლემის გადასაჭრელად და სხვა საკითხების განსახილველად, განსაკუთრებით იმ საკითხებისა, რომლებსაც ფინანსური შედეგები მოჰყვება“. dpa-ს ცნობით, საუბარია 45 მილიარდ ევროზე, რომელიც უკრაინას მომავალი წლისთვის აკლია.
მერცი ასევე მოითხოვს, რომ ევროკავშირის 2028–2034 წლების ბიუჯეტზე მოლაპარაკებებისას წევრი ქვეყნები შეთანხმდნენ, როგორ უზრუნველყონ უკრაინის სტაბილური დაფინანსება რამდენიმე წლის განმავლობაში. უკრაინა უკვე მეხუთე წელია იგერიებს რუსეთის აგრესიას. „უკრაინის მხარდაჭერა ჩვენი საერთო, განუყოფელი ევროპული უსაფრთხოების საკითხია და ეს პრინციპი ამ მხარდაჭერის ტვირთის განაწილებაზეც უნდა გავრცელდეს“, — ხაზგასმით აღნიშნა მერცმა.
წერილში მერცი ევროპული საბჭოს პრეზიდენტს მოუწოდებს, ამ საკითხს პრიორიტეტი მიანიჭოს ევროკავშირის არაფორმალურ სამიტზე, რომელიც 13 ნოემბერს დუბლინში გაიმართება.
უკრაინის დახმარებისთვის მილიარდობით ევროა საჭირო
ევროკომისიის ადრინდელი შეფასებით, მომავალ წელს უკრაინის დახმარების დასაფინანსებლად 70 მილიარდი ევრო აკლია. აქედან 45 მილიარდი ევროკავშირმა უნდა დაფაროს. ჯერ კიდევ გასულ წელს ევროკავშირი შეთანხმდა, რომ კიევს 2026 და 2027 წლებისთვის 90 მილიარდი ევროს სესხს გამოუყოფდა. ამ გადაწყვეტილებას უნგრეთის წინა მთავრობა დიდხანს ბლოკავდა, თუმცა ქვეყნის ახალმა პრემიერ-მინისტრმა პეტერ მადიარმა დაბრკოლება მოხსნა. კიევმა სესხის პირველი ტრანში 25 ივნისს მიიღო.
ეს თანხა უკვე საკმარისი აღარ არის. ოქტომბერში უკრაინის პრეზიდენტმა ვოლოდიმირ ზელენსკიმ პარტნიორებს დამატებით 70 მილიარდი ევრო სთხოვა, რათა უკრაინამ რუსეთის აგრესიის მოგერიება შეძლოს. ევროკავშირის წევრი ქვეყნების სახელმწიფოსა და მთავრობის მეთაურებმა ევროკომისიას დაავალეს, შეიმუშაოს წინადადება იმის შესახებ, თუ როგორ შეიძლება საჭირო თანხის მოძიება.
ვის არ სურს ევროპაში უკრაინის დახმარების დაფინანსებაში მონაწილეობა?
ბულგარეთის პრეზიდენტმა რუმენ რადევმა და სლოვაკეთის პრემიერ-მინისტრმა რობერტ ფიცომ უკვე განაცხადეს, რომ უკრაინისთვის ევროკავშირის ახალი ფინანსური დახმარების გაწევაში მონაწილეობას არ აპირებენ. ჯერჯერობით უცნობია, შეიტანენ თუ არა წვლილს უნგრეთი და ჩეხეთი. 10 ნოემბერს მერცი ბერლინში მადიარს შეხვდება. მოსალოდნელია, რომ კიევის დახმარება შეხვედრის ერთ-ერთი მთავარი თემა იქნება.
ევროკავშირის ქვეყნებს შორის გერმანია უკრაინის უმსხვილესი დონორია და დახმარების მოცულობით სხვა წევრ ქვეყნებს მნიშვნელოვნად უსწრებს. გერმანიის მთავრობის შეფასებით, 2026 წლის 30 ივნისის მდგომარეობით, უკრაინისთვის მისი მხარდაჭერის მოცულობამ 100 მილიარდი ევრო შეადგინა. თუმცა კილის მსოფლიო ეკონომიკის ინსტიტუტის (IfW) შეფასებით, ამ თანხიდან 36 მილიარდი ევრო თავად გერმანიაში დაიხარჯა, კიდევ 22 მილიარდი კი სამომავლო ვალდებულებებზე მოდის.