აშშ-ის პრეზიდენტის წარმომადგენლებმა, ჯარედ კუშნერმა და სტივ უიტკოფმა, ხუთშაბათს მოსკოვში ვლადიმირ პუტინთან მოლაპარაკებები გამართეს, რის შემდეგაც დუბლინში ვოლოდიმირ ზელენსკის შეხვდნენ.
ამ შეხვედრების შემდეგ მათ განაცხადეს, რომ მოსკოვი და კიევი დათანხმდნენ ვაშინგტონის წინადადებას სამშვიდობო მოლაპარაკებებში ევროპის წარმომადგენლების ჩართვის შესახებ. მოლაპარაკებები ამ კვირაში სამმხრივ ფორმატში — რუსეთის, უკრაინისა და აშშ-ის მონაწილეობით — განახლდა. თუმცა კრემლს თანხმობა არ დაუდასტურებია.
„ორივე მხარე დათანხმდა მოლაპარაკებების შემდეგი რაუნდის [ფორმატის] გაფართოებას და მასში ჩვენი ევროპელი პარტნიორების ჩართვას“, — დაწერა კუშნერმა X-ზე. ზელენსკიმ კი ტელეგრამში განაცხადა: „ევროპელ წარმომადგენლებს კიდევ უფრო აქტიურად ვრთავთ დიპლომატიურ პროცესში, რათა ისინი მოლაპარაკებების მაგიდასთან თანაბარ პირობებში იყვნენ წარმოდგენილი“.
პუტინის თანაშემწე იური უშაკოვს მოლაპარაკებების შედეგების შესახებ კომენტარში, რომელიც კრემლის ვებგვერდზე გამოქვეყნდა, არ დაუდასტურებია მოსკოვის თანხმობა შემდგომ სამშვიდობო მოლაპარაკებებში ევროპელების მონაწილეობაზე.
„ისინი ყველანაირად ცდილობენ მოლაპარაკებებში ჩართვას, მაგრამ, როგორც ჩვენმა პრეზიდენტმა თქვა, უნდა გადაწყვიტონ, მშვიდობა სურთ თუ ომის გაგრძელება“, — განაცხადა უშაკოვმა. ის გულისხმობდა ფრაზას, რომელიც პუტინმა უიტკოფთან და კუშნერთან შეხვედრის პირველ წუთებში წარმოთქვა. პუტინმა მათ სთხოვა, „იმუშაოთ თქვენს ევროპელ მოკავშირეებთან, რათა მათ საბოლოოდ გადაწყვიტონ, რა სურთ — მშვიდობა თუ ომი“.
თებერვლის შემდეგ პირველი სამმხრივი მოლაპარაკებები რუსეთის, უკრაინისა და აშშ-ის მონაწილეობით 10–11 ნოემბერს აბუ-დაბიში გაიმართა. მათი დასრულების შემდეგ ჯარედ კუშნერმა თქვა, რომ შეეცდებოდა პუტინის დარწმუნებას, ევროპელებისთვის მოლაპარაკებების პროცესში ჩართვის ნება მიეცა.
„ეს საშუალებას მოგვცემს, ერთდროულად განვიხილოთ როგორც უკრაინასა და რუსეთს შორის ტერიტორიული საკითხები, ისე ევროპის ომისშემდგომი უსაფრთხოების სისტემის უფრო ფართო ასპექტები“, — დაწერა კუშნერმა პუტინთან და ზელენსკისთან შეხვედრების შემდეგ.
„იმისთვის, რომ საბრძოლო მოქმედებები საბოლოოდ შეწყდეს, უსაფრთხოების საიმედო გარანტიებია საჭირო, — დასძინა მან. — ამ ურთიერთდაკავშირებული საკითხების განხილვას პარალელურად დავიწყებთ“.
წინა დღეს, ჯერ კიდევ ამერიკელი შუამავლების მოსკოვში პუტინთან და დუბლინში ზელენსკისთან შეხვედრებამდე, გამოცემა Axios-ის წყაროები იდეას ასე აღწერდნენ: უკრაინაში ომის დასრულების პირობების განხილვის პარალელურად უნდა განიხილონ ევროპაში „უსაფრთხოების არქიტექტურა“, რასაც მოსკოვი დაჟინებით მოითხოვდა. ამასთან, რუსეთმა უნდა წარმოადგინოს განახლებული მოთხოვნები და არა ის მოთხოვნები, რომლებსაც პუტინი 2021 წელს, უკრაინაში სრულმასშტაბიანი შეჭრის დაწყებამდე აყენებდა.
უშაკოვმა დაადასტურა, რომ პუტინმა უიტკოფსა და კუშნერს შეახსენა თავისი ხედვა „განუყოფელი უსაფრთხოების არქიტექტურის ძირითადი ელემენტების“ შესახებ, რომლებზეც 2021 წელს საუბრობდა. „გვინდა, ამას ჩვენი ზოგიერთი ახალი მოსაზრებაც დავუმატოთ“, — განაცხადა პუტინის თანაშემწემ და ამით ირიბად დაადასტურა Axios-ის ინფორმაცია.
„ევროპელები მომდევნო შეხვედრაზე შემოგვიერთდებიან“, — თქვა უიტკოფმა ხუთშაბათს, Reuters-ის ცნობით. როდის გაიმართება მოლაპარაკებების შემდეგი რაუნდი, უცნობია. უშაკოვს ამის შესახებ არაფერი უთქვამს, კუშნერმა კი X-ზე დაწერა: „უახლოეს მომავალში ვგეგმავთ მოლაპარაკებების ფორმატების, შეხვედრების განრიგისა და სხვა დეტალების გამოცხადებას“.