დღეს ე.წ. საბოტაჟის საქმეზე, რომელიც მტკიცებულებათა გამოკვლევის ეტაპზეა, მორიგი სასამართლო პროცესი გაიმართა. მოსამართლის გადაწყვეტილებით, საქმის განხილვა დახურულია.პროცესის დასრულების შემდეგ ზურაბ ჯაფარიძემ, რომელიც ერთ-ერთი ბრალდებულია, პოსტი გამოაქვეყნა, რომელშიც წერს, რომ დღევანდელ პროცესზე პოლიციის თანამშრომელი ნიკოლოზ კოპაძე გამოიკითხა.
„რადგან დახურულია სხდომები და მედიასაც არ უშვებენ, დავწერ ხოლმე მოკლედ.
მოწმე, ვინმე ნიკოლოზ კოპაძე, პოლიციის თანამშრომელი ხელს გვადებს მე, ლაკასა და ვაშაძეს, თითქოს დაგვინახა და გაიგონა როგორ მოვუწოდებდით ხალხს – მივაწვეთ, გავარღვიოთ, არ გავჩერდეთ, ავიღოთ პარლამენტის შენობაო.
საქმეში არ არსებობს 1 კადრიც კი, სადაც ჩვენ ამასთან მიახლოებულ რაიმეს ვიძახით. (ზუსტად სიტყვები არ მახსოვსო) საქმეში დევს ათობით საათი ვიდეო ჩანაწერები.
არ არსებობს 1 კადრიც კი, სადაც ჩვენ ამასთან მიახლოებულ რაიმეს ვიძახით ან ჟესტიკულაციით ვაკეთებთ. ვინმე კოპაძე ჰყვება, რომ დაინახა როგორ ჩავდიოდით ამ დანაშაულს, მაგრამ არ იცის, რატომ არ დაწერა ამაზე პატაკი (5 თვის მერე მოჰყვა, პროკურატურაში როცა დაიბარეს).
იგივე კოპაძემ არ იცის, რატომ არ მოითხოვა ამავე ან მეორე დღეს კამერების ჩანაწერების ამოღება (ქუჩის, სამკერდე, სხვა), სადაც დაფიქსირებული იქნებოდა ჩვენი ეს ქმედება.
იმავე კოპაძემ დამიდასტურა, რომ მეც წინა რიგში ვიდექი და ამიტომ გაიგონა რას ვიძახდი, მაგრამ ვერ ხსნის როგორ გადავურჩი წყლის ჭავლით გაწუწვას 28-ში (სხვა დღეებში გავიწუწე ორჯერ), როცა თვითონ მოჰყვა, რომ რამდენჯერმე მოგვიშვეს ჭავლი.
არ ახსოვს რა მეცვა, ზუსტად სად ვიდექი, ვინ იდგა ჩემთან ერთად, ლაკა და/ან ვაშაძე ჩემთან ერთად იყვნენ თუ არა სხვა არაფერი არ ახსოვს თუმცა ახსოვს რომ ვიდეოჩანაწერშიც მნახა როგორ ვაკეთებდი პარლამენტის აღების მოწოდებებს.
ვიდეოში, რომელიც პროკურატურაში აჩვენეს და საქმეში დევს ოღონდ ეგეთი ვიდეო ბუნებაში არ არსებობს, არათუ საქმეში.“ – წერს ზურა ჯაფარიძე