დონალდ ტრამპის ადმინისტრაცია მალიში სამხედრო ჩარევის შესაძლებლობას განიხილავს, სადაც „ალ-ქაიდასთან“ დაკავშირებული დაჯგუფებები ძლიერდებიან, წერს The Washington Post.
აშშ-ის პრეზიდენტ დონალდ ტრამპის ადმინისტრაცია მალიში „ალ-ქაიდასთან“ დაკავშირებული ჯიჰადისტური დაჯგუფების — „ისლამისა და მუსლიმების მხარდაჭერის ჯგუფის“ (JNIM) — წინააღმდეგ სამხედრო ოპერაციის ჩატარების შესაძლებლობას განიხილავს. ამის შესახებ ოთხშაბათს, 22 ივლისს, The Washington Post-მა რამდენიმე წყაროზე დაყრდნობით დაწერა.
გამოცემის ცნობით, მაღალი თანამდებობის ამერიკელ მოხელეებს შორის აზრთა სხვადასხვაობაა იმის შესახებ, უნდა დაიწყოს თუ არა აშშ-მა JNIM-ის წინააღმდეგ სამხედრო მოქმედებები. ძალის გამოყენების ერთ-ერთი მთავარი მომხრეა ეროვნული უსაფრთხოების საბჭოს ტერორიზმთან ბრძოლის საკითხებში უფროსი დირექტორი სებასტიან გორკა.
პენტაგონმა კომენტარის გაკეთებაზე უარი თქვა. თეთრ სახლში კი The Washington Post-ს განუცხადეს, რომ აშშ ჩრდილოეთ და დასავლეთ აფრიკის ქვეყნებს მოუწოდებს, ტერორისტების წინააღმდეგ სამხედრო ძალისხმევის მხარდასაჭერად ამერიკული აღჭურვილობა და მომსახურება შეიძინონ.
თეთრი სახლის წარმომადგენელმა საჰელში ტერორიზმს „მრავალეროვნული პრობლემა“ უწოდა და რეგიონულ პარტნიორებსა და ნატოს მოკავშირეებს მოუწოდა, JNIM-ისა და „ისლამური სახელმწიფოს“ წინააღმდეგ ბრძოლაში საჰელის სახელმწიფოთა ალიანსს დაეხმარონ.
ვაშინგტონი რეგიონში შექმნილ ვითარებაში მოსკოვს ადანაშაულებს
საჰელის სახელმწიფოთა ალიანსში შედიან მალი, ბურკინა-ფასო და ნიგერი. ბოლო წლებში სამივე დასავლეთაფრიკულ ქვეყანაში სამხედროებმა სახელმწიფო გადატრიალებების შედეგად დემოკრატიულად არჩეული მთავრობები დაამხეს. ამის შემდეგ მათ დასავლეთთან ურთიერთობები მნიშვნელოვნად შეამცირეს და უსაფრთხოების სფეროში დახმარებისთვის რუსეთს მიმართეს.
ტრამპის ადმინისტრაციის წარმომადგენელმა რეგიონში არსებული არასტაბილურობა მოსკოვს დაუკავშირა და განაცხადა, რომ რუსეთმა „მალის უსაფრთხოების პარტნიორის როლში თავისი არაეფექტიანობა დაამტკიცა“.
მისი თქმით, ვაშინგტონი იმედოვნებს, რომ სხვა აფრიკული სახელმწიფოებიც ყურადღებას მიაქცევენ ტერორიზმთან ბრძოლაში რუსეთის „სავალალო შედეგებს“.
მალის ხელისუფლებასა და ექსტრემისტულ და სეპარატისტულ დაჯგუფებებს შორის შეიარაღებული კონფლიქტი 2012 წელს დაიწყო. მას შემდეგ ქვეყანა უსაფრთხოებისა და სოციალურ-ეკონომიკური განვითარების მძიმე კრიზისში იმყოფება.
რუსი დაქირავებული მებრძოლები მალიში 2021 წლიდან იმყოფებიან. 2020 წელს ქვეყანაში ხელისუფლება პოლკოვნიკ ასიმი გოიტას ხელმძღვანელობით სამხედროებმა ჩაიგდეს ხელში. მათ საფრანგეთთან ტრადიციული კავშირები გაწყვიტეს, რუსეთთან დაახლოება დაიწყეს და ქვეყანაში კერძო სამხედრო კომპანია „ვაგნერის“ მებრძოლები მიიწვიეს.
„ვაგნერის“ დამფუძნებლის, ევგენი პრიგოჟინის გარდაცვალების შემდეგ, დაჯგუფება „აფრიკის კორპუსმა“ ჩაანაცვლა, რომელიც რუსეთის თავდაცვის სამინისტროსთან უფრო მჭიდროდ არის დაკავშირებული. მალიში მოქმედ რუს დაქირავებულ მებრძოლებსა და სამხედროებს მშვიდობიანი მოსახლეობის მკვლელობებში არაერთხელ დასდეს ბრალი.
