“აფხაზეთისა და სამხრეთ ოსეთის აღიარება საქართველოს ინტერესებშია” – განაცხადა ოკუპირებული ცხინვალის რეგიონის მარიონეტული რეჟიმის წარმომადგენლემა, ე.წ. საგარეო საქმეთა მინისტრმა ახსარ ჯიოევმა რუსულ სამთავრობო-პროპაგანდისტულ მედიასთან საუბრისას.
“საქართველო ჯერჯერობით არ აღიარებს 2008 წლის აგვისტოს შემდეგ შექმნილ ახალ გეოპოლიტიკურ რეალობას, მიუხედავად იმისა, რომ ორი ახალი სახელმწიფოს აღიარება და მათთან ურთიერთსასარგებლო ურთიერთობის დამყარება მის ინტერესებსაც პასუხობს. […] სამხრეთ ოსეთისთვის საკუთარი უსაფრთხოების უზრუნველყოფას უპირველესი მნიშვნელობა აქვს. ეს განსაკუთრებით აქტუალურია იმ ფონზე, როდესაც საქართველო ჟენევის საერთაშორისო დისკუსიების ფარგლებში სამხრეთ ოსეთის წინააღმდეგ ძალის გამოუყენებლობის შესახებ იურიდიულად სავალდებულო დოკუმენტის ხელმოწერაზე უარს ამბობს. ცხადია, რომ საქართველოს მხარის მსგავსი პოზიცია რეგიონში ნდობისა და სტაბილურობის განმტკიცებას ხელს არ უწყობს. მიუხედავად ამისა, ჩვენ მოლაპარაკებების პროცესში თანასწორუფლებიანი და პატივისცემაზე დაფუძნებული დიალოგის მომხრე ვართ და ვცდილობთ, საერთაშორისო დისკუსიებმა კონკრეტულ და ქმედით შედეგებამდე მიგვიყვანოს. დარწმუნებული ვართ, რომ ყველა დაინტერესებული მხარის ღია და კონსტრუქციული მიდგომა არსებული გამოწვევების გადასაჭრელად და ახალი საფრთხეების თავიდან ასაცილებლად უმნიშვნელოვანესია.საგარეო პოლიტიკური მიმართულებით ცხინვალისა და მოსკოვის ერთობლივი ძალისხმევა რესპუბლიკის საერთაშორისო სამართლებრივი სტატუსის განმტკიცებაზეა მიმართული. კოორდინირებული კურსი სამხრეთ ოსეთის სუვერენიტეტის დაცვას უზრუნველყოფს და ასევე ხელს უწყობს სამხრეთ ოსეთის საერთაშორისო კონტაქტების გაფართოებას.” – დაამატა მარიონეტული რეჟიმის წარმომადგენელმა.