აშშ-ის პრეზიდენტმა დონალდ ტრამპმა განაცხადა, რომ ვაშინგტონმა ვენესუელასთან „ისტორიული“ შეთანხმება გააფორმა, რომლის შედეგადაც შეერთებულმა შტატებმა სამხრეთამერიკული ქვეყნის ნავთობის მარაგების მეხუთედზე კონტროლი მიიღო. Truth Social-ში 29 აგვისტოს გამოქვეყნებულ პოსტში მან შეთანხმებას „მსოფლიო ისტორიაში ყველაზე დიდი ნავთობის გარიგება“ უწოდა.
„ეს ისტორიული შეთანხმება ამერიკის ნავთობის მარაგებს ორჯერ მეტად გაზრდის, მნიშვნელოვნად გააფართოებს ჩვენს მიწოდებას და მრავალი წლის განმავლობაში საგრძნობლად შეამცირებს ბენზინის ფასებს ყველა ამერიკელისთვის“, — დაწერა ტრამპმა, თუმცა შეთანხმების დეტალები არ დაუკონკრეტებია.
აშშ-ის კონტროლი ვენესუელის 65 მილიარდ ბარელზე
თეთრი სახლის ხელმძღვანელის თქმით, აშშ-მა კონტროლი მიიღო ვენესუელაში არსებულ 65 მილიარდ ბარელზე მეტ დადასტურებულ ნავთობის მარაგზე — კერძო კომპანიებთან პარტნიორობის შედეგად და „ამერიკელი გადასახადის გადამხდელებისთვის ყოველგვარი ხარჯის გარეშე“.
ტრამპის განცხადებით, შეთანხმების გაფორმებაში მონაწილეობდნენ აშშ-ის სახელმწიფო მდივანი მარკო რუბიო, თავდაცვის მინისტრი პიტ ჰეგსეთი და ვენესუელის დროებითი პრეზიდენტი დელსი როდრიგესი.
ბოლო რამდენიმე კვირის განმავლობაში აშშ ვენესუელასთან აწარმოებდა მოლაპარაკებებს, რათა ამერიკულ კომპანიებს ვენესუელის რამდენიმე ნავთობის საბადოზე გრძელვადიანი წვდომა მიეღოთ და მოპოვებული ნედლი ნავთობის შეერთებულ შტატებში მიწოდება გარანტირებული ყოფილიყო.
ვენესუელას მსოფლიოში ყველაზე დიდი დადასტურებული ნავთობის მარაგები აქვს, თუმცა მრავალწლიანი ინვესტიციების ნაკლებობის, არაეფექტიანი მართვისა და სანქციების გამო ქვეყანა დღე-ღამეში მხოლოდ დაახლოებით 1,25 მილიონ ბარელ ნავთობს მოიპოვებს.