“საქართველომ დროულად თქვა უარი “ევროპულ პერანგზე“–რუსი ექსპერტი

კრემლის მიერ კონტროლირებადი მედიასაშუალება –РИА Новости კიდევ ერთხელ წერს სომხეთის მიერ არჩეულ “დამღუპველ პროევროპულ გზაზე.“ ამჯერად, ამ თემაზე ექსპერტი ივან სოლოვიოვი საუბრობს და გონივრული გადაწყვეტილების მაგალითად საქართველო მოჰყავს, რომელმაც ევროპაზე უარი თქვა.

სომხეთის ევროინტეგრაციისკენ სწრაფვას ქვეყნისთვის შესაძლოა დამღუპველი შედეგები მოჰყვეს, განუცხადა РИА Новости-ს რუსეთის ფედერაციის დამსახურებულმა იურისტმა და სამართალმცოდნემ ივან სოლოვიოვმა.

„სომხეთი აგრძელებს რუსეთთან მჭიდრო და ნაყოფიერი თანამშრომლობის გაწყვეტის კურსს და ცდილობს დასავლელ მფარველებს ასიამოვნოს, თუმცა, სავარაუდოდ, ვერც კი აცნობიერებს, რა დამღუპველი სამართლებრივი და სხვა შედეგები შეიძლება მოჰყვეს ევროკავშირისკენ მის სწრაფვას“, — განაცხადა სოლოვიოვმა.

მისი თქმით, დიდი კითხვაა ისიც, გაუძლებს თუ არა სომხეთის ეკონომიკა ევროკავშირის შიგნით კონკურენციას და დააკმაყოფილებს თუ არა სომხური პროდუქცია ევროკავშირის ხარისხის კრიტერიუმებს.

„მაგრამ მთავარი საკითხია ცხოვრების ჩამოყალიბებული წესი და ისტორიული ეროვნული ტრადიციები. ისინი გაირეცხება და ნაწილობრივ განადგურდება მულტიკულტურალიზმითა და ევროპული მრავალფეროვნებით, რაც სომხური კულტურისა და სამართლებრივი სისტემისთვის უცხოა“, — განაცხადა მან.

სოლოვიოვის თქმით, გეოგრაფიულად სომხეთი ევროკავშირისგან შორსაა და მისთვის საინტერესოა მხოლოდ როგორც რუსეთის წინააღმდეგ მოქმედებისა და მასზე ზეწოლის პლაცდარმი.

„სხვათა შორის, საქართველომ, რომელმაც „ევროპული პერანგი მოირგო“, მასზე უარი თქვა, რადგან დროულად მიხვდა, რომ სინამდვილეში ის დამაწყნარებელი პერანგია“, — განაცხადა სოლოვიოვმა.