რუსულმა საოკუპაციო ძალებმა უკრაინის დედაქალაქის ცენტრში, ვოლოდიმირსკას ქუჩაზე მდებარე უკრაინის უსაფრთხოების სამსახურის მთავარ შენობაზე იერიში დრონით მიიტანეს.
კიევის ინფორმაციით, სამიზნეს უშუალოდ უწყების ხელმძღვანელის მოვალეობის შემსრულებლის, გენერალ-მაიორ ალექსანდრ პოკლადის სამუშაო კაბინეტი წარმოადგენდა.
უკრაინული მედიისა და სამაშველო სამსახურების ცნობით, დარტყმის მომენტში გენერალი კაბინეტში არ იმყოფებოდა, რის გამოც ის უვნებელი გადარჩა. თუმცა, თავდასხმის შედეგად შენობაში ძლიერი ხანძარი გაჩნდა და ბოლო მონაცემებით, დაშავებულია 7 ადამიანი, მათ შორის უწყების თანამშრომლები. შემთხვევის ადგილზე მობილიზებული იყო საგანგებო სიტუაციების მართვის სამსახურის რამდენიმე ბრიგადა.
მომხდარს სპეციალური მიმართვით გამოეხმაურა უკრაინის პრეზიდენტი. მან დაადასტურა, რომ თავდასხმა წმინდა სოფიას ტაძრის მოპირდაპირე მხარეს მდებარე ცენტრალურ ოფისზე განხორციელდა და მას მიზანმიმართული ხასიათი ჰქონდა.
„დრონი პირდაპირ უსაფრთხოების სამსახურის უფროსის კაბინეტისკენ იყო მიმართული. პოკლადს დავავალე, რომ რუსების ქმედებაზე ადეკვატური და ხელშესახები რეაგირება მოახდინონ, შესაძლებლობის შემთხვევაში, ამ დარტყმას სარკისებურად უპასუხონ, როგორც კი ყველაფერი მზად იქნება. ჩვენი სამხედროები მხარს დაუჭერენ ამ რეაგირებას“, – განაცხადა ვოლოდიმირ ზელენსკიმ.