4 ოქტომბრის საქმეზე დაკავებულ ბექა ჭულუხაძეს საპროცესო შეთანხმება გაუფორმდა. დაკავებულის ადვოკატი ტაბულას ეუბნება, რომ ჭულუხაძე საპატიმროს ივლისში დატოვებს. ჭულუხაძეს 1-წლიანი რეალური და 2-წლიანი პირობითი მსჯავრი განესაზღვრა.
“მან აღიარა, რომ ჰქონდა იარაღი, მისი იყო და ინახავდა მართლსაწინააღმდეგოდ, სხვა არაფერი უღიარებია… ჩემ დაცვისქვეშ მყოფს არც ჩვენება მიუცია ვინმეს წინააღმდეგ.”, – თქვა ადვოკატმა, გაიოზ ჩარკვიანმა.
“ამ სისხლის სამართლის საქმეზე იყო საუბარი და მტკიცება იმის, რომ კონკრეტულ პირს, ბექა ჭულუხაძის მართლსაწინააღმდეგოდ შეძენილი და შენახული ჰქონდა საბრძოლო მასალა და ასაფეთქებელი ნივთიერებები, რაც ბრალდებულმაც აღიარა.[…]იმ გამოყოფილ სისხლის სამართლის საქმეზე არა მხოლოდ ბაჩანა ახალაიას, არამედ სხვა ნებისმიერი პირის ჩართულობის ნაწილში მიმდინარეობს, ბუნებრივია, ძიება. ამ შემთხვევაში, მე არც დაგიდასტურებთ და არც უარვყოფ კონკრეტულად რა ვერსიებზე მიდის მუშაობა, შესაბამისად, თუ საჭირო გახდება და საგამოძიებო ორგანო მიიჩნევს, რომ აუცილებელია ამ მიმართულებით ბექა ჭულუხაძის მიერ ჩვენების მიცემა და ა.შ., ბუნებრივია, ამ ვერსიასაც ექნება თავისი განვითარება”, – უთხრა ტვ პირველს პროკურორმა.
უკრაინის წინააღმდეგ მებრძოლ საქართველოს მოქალაქე ბექა ჭულუხაძე 2026 წლის 10 ივლისს დააკავეს. სუს-ის ცნობით, მას შეძენილი ჰქონდა საბრძოლო მასალა, “რომლითაც 4 ოქტომბრის არეულობის ორგანიზატორებს საჭიროების შემთხვევაში დივერსია უნდა მოეწყოთ. ჭულუხაძეს ბრალად ედებოდა 2025 წლის 4 ოქტომბერს დაორგანიზებული ჯგუფური ძალადობისა და პრეზიდენტის სასახლის ხელში ჩაგდების პარალელურად, დივერსიული აქტების მოწყობის მიზნით დიდი რაოდენობით ცეცხლსასროლი იარაღის, საბრძოლო მასალისა და ასაფეთქებელი საშუალებების შეძენა-შენახვა.