რუსული ავიაკომპანია Red Wings-ი საქართველოს საავიაციო ბაზარზე საკუთარი წარმომადგენლობის მნიშვნელოვნად გაზრდას აპირებს. კომპანიამ ოფიციალური მოთხოვნით უკვე მიმართა რუსეთის სამოქალაქო ავიაციის ფედერალურ სააგენტოს – „როსავიაცია“-ს, რათა თბილისისა და ბათუმის მიმართულებით ახალი რეგულარული რეისების შესრულებისთვის საჭირო ე.წ. საჰაერო დაშვებები მიიღოს.
არსებული ინფორმაციით, რუსულ გადამყვანს საჰაერო მიმოსვლის გეოგრაფიის გაფართოება დამატებით 20-ზე მეტი რუსული ქალაქიდან სურს. კერძოდ, განაცხადის მიხედვით, Red Wings-ი გეგმავს ახალი ავიარეისების დანიშვნას თბილისის მიმართულებით რუსეთის 6 სხვადასხვა ქალაქიდან, ხოლო საზღვაო კურორტ ბათუმის მიმართულებით — 17 ქალაქიდან.
ავიაკომპანია Red Wings-ი საქართველოს მიმართულებით ფრენებს 2023 წლის ზაფხულიდან ახორციელებს, ხოლო მიმდინარე წლის საზაფხულო სეზონზე ისედაც ოპერირებდა რუსეთის 15 ქალაქიდან. უშუალოდ „როსავიაციისგან“ ნებართვების მიღების შემთხვევაში, საკითხი განსახილველად საქართველოს სამოქალაქო ავიაციის სააგენტოს გადაეცემა, რომელიც საბოლოო საექსპლუატაციო ნებართვების გაცემაზეა პასუხისმგებელი.