რომის პაპი ლეო XIV საფრანგეთში ვიზიტისას სასულიერო პირების მხრიდან სექსუალური ძალადობის შვიდ მსხვერპლს შეხვდა. ის თითოეულ მათგანს ცალ-ცალკე ესაუბრა. შეხვედრა დაახლოებით ორ საათს გაგრძელდა.
რომის პაპი ლეო XIV კვირას, 27 სექტემბერს, ოთხ მამაკაცსა და სამ ქალს შეხვდა, რომლებიც საფრანგეთში კათოლიკე სასულიერო პირების მხრიდან სექსუალური ძალადობის მსხვერპლები გახდნენ. შეხვედრები ტარბისა და ლურდის ეპისკოპოსის რეზიდენციაში გაიმართა. წმინდა საყდრის პრესსამსახურის ცნობით, ლეო XIV თითოეულ მათგანს ცალ-ცალკე ესაუბრა.
შეხვედრები ადგილობრივი დროით 17:30 საათის შემდეგ დაიწყო და დაახლოებით ორ საათს გაგრძელდა. პაპმა მოისმინა დაზარალებულთა ისტორიები და მათი წინადადებები იმის შესახებ, თუ როგორ შეიძლება მომავალში მსგავსი დანაშაულების თავიდან აცილება. ზოგიერთ მათგანთან ერთად მან რამდენიმე წუთის განმავლობაში ილოცა.
19:00 საათის შემდეგ ლეო XIV ყველა დაზარალებულს ერთ ოთახში შეხვდა და შეხვედრისთვის მადლობა გადაუხადა. მან თანამშრომლობის იმედიც გამოთქვა, რათა მორწმუნეთა თემი იქცეს ადგილად, სადაც „ყველა ასაკის ქალი და კაცი ნუგეშსა და განკურნებას იპოვის“.
ლეო XIV-მ ფრანგ ეპისკოპოსებს ძალადობის პრობლემაზე მუშაობისთვის მადლობა გადაუხადა
ლურდში ვიზიტისას პაპი საფრანგეთის კათოლიკე ეპისკოპოსთა კონფერენციის წევრებსაც შეხვდა. ეს ორგანო კათოლიკურ თემში წამოჭრილ ლიტურგიულ, დისციპლინურ და სხვა საკითხებს განიხილავს. ლეო XIV-მ მათ მადლობა გადაუხადა იმისთვის, რომ ბოლო წლებში აქტიურად მუშაობენ სასულიერო პირების მხრიდან არასრულწლოვანებზე ძალადობის მტკივნეული პრობლემის მოსაგვარებლად.
„თქვენ გადადგით გაბედული ნაბიჯები ამ ძალადობასთან საბრძოლველად: ყურადღებით მოუსმინეთ დაზარალებულებს, იღვაწეთ სიმართლის, სამართლიანობის, პატიებისა და გამოსყიდვისთვის და მტკიცედ დაიცავით ამ დანაშაულების პრევენციისა და ადამიანების დაცვის პრინციპები. მადლობას გიხდით ყველაფრისთვის, რაც გააკეთეთ. ვიცი, რომ თქვენს კონფერენციას ძალიან მძიმე პერიოდების გავლა მოუხდა. აუცილებელია არჩეული გზის გაგრძელება და მაქსიმალური სიფხიზლის შენარჩუნება“, — თქვა პაპმა.
ლეო XIV საფრანგეთში ოთხდღიანი ვიზიტით იმყოფება
ლეო XIV-ის საფრანგეთში ვიზიტი 25 სექტემბერს დაიწყო. ეს რომის პაპის პირველი ოფიციალური ვიზიტია ამ ქვეყანაში 2008 წლის სექტემბრის შემდეგ, როცა კათოლიკური ეკლესიის მეთაური ბენედიქტე XVI იყო.
პაპი საფრანგეთში ოთხ დღეს გაატარებს. 25 სექტემბერს მან პარიზის ღვთისმშობლის ტაძარში საღამოს ღვთისმსახურება ჩაატარა, შემდეგ კი პარიზის „სტად დე ფრანსზე“ ახალგაზრდებთან ერთად მასშტაბურ ლოცვით შეკრებაში მიიღო მონაწილეობა. მომდევნო დღეს მან პარიზში, თანხმობის მოედანზე, მესა ჩაატარა, რომელსაც 700 ათასი ადამიანი დაესწრო.
27 სექტემბერს რომის პაპი ევროპის ერთ-ერთ მთავარ სალოცავ ცენტრში, ლურდში ჩავიდა. კათოლიკური ეკლესია სარწმუნოდ მიიჩნევს ცნობებს იმის შესახებ, რომ 1858 წელს ადგილობრივ მასაბიელის მღვიმეში 14 წლის ბერნადეტ სუბირუს ღვთისმშობელი არაერთხელ გამოეცხადა. სექსუალური ძალადობის მსხვერპლებთან შეხვედრის გარდა, ლეო XIV-მ ლურდში მესა ჩაატარა და ჩირაღდნებით მსვლელობას გაუძღვა. 28 სექტემბერს ის მეცში ევროკავშირის ლიდერების წინაშე გამოსვლას გეგმავს.