88 წლის ასაკში გარდაიცვალა ფრანგი მსახიობი მარინა ვლადი, ვლადიმირ ვისოცკის ქვრივი. მსახიობის გარდაცვალების შესახებ AFP-ს მისმა ოჯახის წევრებმა აცნობეს.
მარინა ვლადი (ეკატერინა-მარინა პოლიაკოვა-ბაიდაროვა) პარიზის მახლობლად, რუსეთიდან ემიგრირებული ოჯახის წევრად დაიბადა.
კინოში პირველად ჯერ კიდევ 11 წლის ასაკში გამოჩნდა — იტალიურ ფილმში.
როგორც მსახიობს, უმუშავია ისეთ ცნობილ რეჟისორებთან, როგორებიც იყვნენ ჟან-ლუკ გოდარი, ორსონ უელსი და ბერტრან ტავერნიე; ასევე უთამაშია მარჩელო მასტროიანისთან ერთად.
მას შესრულებული აქვს როლები ფილმებში „ჯადოქარი“, „კლევის პრინცესა“, „მყარი მტკიცებულებები“, „შუაღამის ზარები“ და სხვა.
1963 წელს ვლადიმ კანის კინოფესტივალის პრიზი მიიღო მარკო ფერერის ფილმში „ფუტკრების დედოფალი“ შესრულებული როლისთვის. ფილმი ასევე ცნობილია სახელწოდებით „საქორწინო საწოლი“.
1965 წელს ვლადი მოსკოვის საერთაშორისო კინოფესტივალის ჟიურის წევრი იყო.
1970 წელს ის ცნობილ საბჭოთა მსახიობზე, პოეტსა და მომღერალ ვლადიმირ ვისოცკიზე დაქორწინდა — ის მსახიობის მესამე ქმარი გახდა. ვლადი ვისოცკის მეუღლე მის გარდაცვალებამდე, 1980 წლამდე იყო. მოგვიანებით მან დაწერა წიგნი „ვლადიმირი, ანუ შეწყვეტილი ფრენა“.
ვისოცკიმდე ვლადი დაქორწინებული იყო რეჟისორ რობერ ოსეინზე და მოგზაურ ჟან-კლოდ ბრუიეზე. პირველი ქორწინებიდან მას ორი ვაჟი ჰყავდა, მეორედან — კიდევ ერთი. ვისოცკისთან შვილები არ ჰყოლია. მისი გარდაცვალების შემდეგ ვლადი კიდევ ერთხელ დაქორწინდა.
„ის საკუთარ სახლში, ახლობლებისა და თავისი ცხოველების გარემოცვაში გარდაიცვალა […] მან ხანგრძლივი, მშვენიერი და მოვლენებით სავსე ცხოვრება განვლო“, — ციტირებს AFP ვლადის შვილების განცხადებას.