ამერიკულმა სპეცსამსახურებმა მოიპოვეს ინფორმაცია იმის შესახებ, რომ რუსეთი ერთ-ერთ ხმელთაშუაზღვისპირა ქვეყანაზე — ესპანეთზე, საფრანგეთზე ან იტალიაზე დრონებით შესაძლო თავდასხმას ამზადებს. ამის შესახებ ესპანური გამოცემა El Mundo ანონიმურ წყაროებზე დაყრდნობით წერს.
გამოცემის წყარომ, რომელიც ლიეტუვის თავდაცვის სამინისტროსთან არის დაახლოებული, განაცხადა, რომ დრონების გაშვება შესაძლოა განხორციელდეს ზღვიდან — გემზე არსებულ კონტეინერში მათი მალული განთავსების გზით. გაზეთის ინფორმაციით, ლიეტუვის ხელისუფლებისთვის ცნობილია აპარატის ტიპიც — ეს არის „გერბერა“, რომლის წონა 18 კილოგრამამდეა, ხოლო ფრენის ოფიციალური მანძილი 600 კილომეტრს აღწევს.
როგორც გამოცემა ამტკიცებს, ლიეტუვამ და სხვა ქვეყნებმა ეს ინფორმაცია 25 აგვისტოს აშშ-ის ცენტრალური სადაზვერვო სამმართველოს (CIA) დირექტორის, ჯონ რეტკლიფის მოსკოვში ვიზიტის შემდეგ მალევე მიიღეს. რეტკლიფი მოსკოვში ამერიკული სამხედრო თვითმფრინავით ჩაფრინდა, რომელსაც მანამდე რიგაში შუალედური გაჩერება ჰქონდა.
ესპანეთის, საფრანგეთის და იტალიის მთავრობებმა ასევე მიიღეს ინფორმაცია იმის შესახებ, რომ რუსეთი ერთ-ერთი ამ ქვეყნის წინააღმდეგ დრონების გამოყენებით შესაძლო ოპერაციას ამზადებს — განუცხადეს გაზეთს ამ გაფრთხილების შინაარსთან ნაცნობმა წყაროებმა. ცენტრალური სადაზვერვო სამმართველოს შეტყობინებაზე ოფიციალური კომენტარი ჯერჯერობით არ გაკეთებულა.